بۇگىن قاڭتار وقيعاسىندا قازا بولعان 4 جاسار ايكوركەمنىڭ ىسىنە بايلانىستى باسپا ءسوز كونفەرەنسياسى ءوتتى. كونفەرەنسيادا ايكوركەمنىڭ اكەسى ايدوس مەلدەحان ۇلى، ونىڭ ادۆوكاتى رافيك بەيسەبەكوۆ جانە بەلگىلى جۋرناليست باكىتجان كوسبارماكوۆ ءسوز سويلەدى.

ادۆوكاتتىڭ ايتۋىنشا، اسكەري تەرگەۋ كوميتەتى قىلمىستىق ءىستى ءبىرجاقتى قاراپ، سوتقا وتكىزبەكشى.

"ءىس قىلمىستىق كودەكستىڭ ءجاسوسپىرىم بالانى ءولتىرۋ ەمەس اسكەري قىزمەت بابىن اسىرا پايدالانۋ بابى بويىنشا قوزعالعان. ايكوركەمگە 5 ادام وق جاۋدىرسا دا، تەرگەۋ ۆزۆود كومانديرىن عانا كىنالى دەپ تانىپ وتىر. ال باسقالارى تەك كۋاگەر رەتىندە تەرگەلگەندىكتەن، جازادان قۇتىلىپ كەتپەك"، دەدى رافيك بەيسەبەكوۆ. 

ايكوركەمگە 5 سارباز وق اتقان. الايدا ساربازداردىڭ ءبىرى جۇمىستان شىعىپ كەتكەن. ال قالعانى كۇدىكتى رەتىندە ەمەس كۋاگەر رەتىندە تىركەلىپتى. 

"جۇمىستان شىعىپ كەتكەن ساربازدىڭ قايدا جۇرگەنى بەلگىسىز. حالىق تولەگەن سالىقتىڭ ارقاسىندا ايلىق الىپ وتىرعان اسكەري پروكۋراتۋرا قاراپايىم حالىققا وق جاۋدىرعانى ازداي، قىلمىستىق ءىستى ادىلەتسىز جۇرگىزىپ وتىر. ولاردىڭ ارەكەتى – زاڭعا قايشى"، دەيدى رافيك بەيسەبەكوۆ.

ال ايكوركەمنىڭ اكەسى ايدوس مەلدەحاننىڭ مالىمدەۋىنشە، ادىلدىك تالاپ ەتكەنى ءۇشىن وعان بەلگىسىز بىرەۋلەر قىسىم كورسەتكەن.

"مەنى بالالارىممەن قورقىتىپ وتىر. قالعان بالالارىڭنان دا ايىرىلىپ قالعىڭ كەلە مە دەپ قوقان-لوقى جاسادى. ءقازىر بالالارىمنىڭ پسيحولوگياسى بۇزىلعان. ءبىزدىڭ ەلدە شىندىق، ادىلدىك جوق. حالىقارالىق تەرگەۋ جۇرگىزىلگەنىن قالايمىن. وسىدان كەيىن جاڭا قازاقستان قۇرىلماعانىنا كوزىم جەتتى"، دەيدى ايدوس مەدەلحان.