جۇڭگو، ءۇندىستان جانە يران ازاماتتارى ءۇشىن قازاقستان اۋماعىندا 14 كۇن ۆيزاسىز جۇرۋىنە رۇقسات بەرىلگەن. وسىعان بايلانىستى Qamshy.kz اقپارات اگەنتتىگى سىرتقى ىستەر مينيسترلىگىنە رەسمي حات جولدادى.
سىرتقى ىستەر مينيسترلىگى ۆيزالىق ءتارتىپتى جەڭىلدەتۋ ەلىمىزدەگى ينۆەستيسيالىق احۋالدى جاقسارتىپ، ءۇش مەملەكەتتەگى سەرىكتەستەرىمەن اراداعى بايلانىستى نىعايتۋ ءۇشىن قاجەت ەكەنىن ايتتى.
"سونداي-اق بۇل رەجيم قازاقستانعا كەلەتىن تۋريستەر اعىنىنىڭ وسۋىنە جانە ءوزارا مادەني الماسۋدى ىنتالاندىرۋعا ىقپال ەتۋگە باعىتتالعان. قحر ازاماتتارى ءۇشىن 14 كۇندىك ۆيزاسىز بولۋ ءتارتىبى بۇرىن قولدانىستا بولعان 3 كۇندىك ۆيزاسىز ترانزيت تاجىريبەسى نەگىزىندە بەلگىلەنگەنىن اتاپ وتكەن ءجون. بۇل ءتارتىپ 2017 جىلى "ەكسپو-2017" حالىقارالىق كورمەسىن وتكىزۋ كەزەڭىندە ەنگىزىلدى"، دەپ جاۋاپ بەردى ءسىم.
مينيسترلىك ءوز جاۋابىندا ۆيزاسىز رەجيمگە قاتىستى كەلىسىم جوباسى ءالى دە تالقىلانىپ جاتىرعانىن حابارلادى.
"قازىرگى ۋاقىتتا تاراپتارمەن تالقىلانىپ جاتقان كەلىسىم جوباسى ەكى مەملەكەت ازاماتتارىنا تەپە-تەڭدىك قاعيداتىنا سايكەس ازاماتتىق پاسپورتتار يەلەرىنە ءوزارا ۆيزاسىز ساپارلارعا جاعداي جاساۋدى كوزدەيدى. ۆيزاسىز ءتارتىپتى ەنگىزۋ ماسەلەسىن پىسىقتاۋ ق ر ازاماتتارىنىڭ تۋريستىك، ىسكەرلىك، تۋىسشىلاۋ جانە ەمدەلۋ ماقساتتارمەن قىتايعا بارۋعا دەگەن جوعارى سۇرانىسىن قاناعاتتاندىرۋ قاجەتتىلىگىنەن تۋىندادى. وسىعان بايلانىستى ق ر سىرتقى ىستەر مينيسترلىگى تاراپىنان شەتەلدىك ساپارلاردى جۇزەگە اسىرۋ كەزىندە ق ر ازاماتتارىنا بارىنشا قولايلى جاعداي جاساۋ ءۇشىن بارلىق شارالار قابىلدانۋدا"، دەلىنگەن رەسمي جاۋاپتا.
پىكىر قالدىرۋ