2ء-شى ناۋرىزدا №24 اۋداندىق سايلاۋ كوميسسياسىنىڭ №55 حاتتاماسىمەن ق ر پارلامەنتى ءماجىلىسىنىڭ سولتۇستىك قازاقستان وبلىسى بويىنشا دەپۋتاتتىعىنا كانديدات اسىلبەك قوجاحمەتوۆتى تىركەۋ تۋرالى شەشىم جويىلدى. اسىلبەك قوجاحمەتوۆ – الماتى مەنەدجمەنت ۋنيۆەرسيتەتىنىڭ پرەزيدەنتى.

ونىڭ كانديداتتىقتان الىنىپ تاستالۋىنا سالىق دەكلاراسياسىندا كورسەتىلگەن قاتە مالىمەتتەر سەبەپ بولعان. ناقتىلايتىن بولساق، اسىلبەك قوجاحمەتوۆ 2001 جىلى تىركەلگەن "بيزنەس كوشباسشىسى" باسقارۋ ويىنىنىڭ تەليەۆيزيالىق سەنارييىنە اۆتورلىقتى قۇقىق تۋرالى قۇجاتتا اتاپ كورسەتپەگەن. الايدا ساياساتكەر ونى ەشقاشان پايدالانباعانىن ايتىپ وتىر.

بۇگىن الماتىدا اسىلبەك قوجاحمەتوۆ پەن ونىڭ سەنىمدى وكىلى دوس كوشىمنىڭ قاتىسۋىمەن باسپا ءسوز كونفەرەنسياسى ءوتتى. كانديداتتىڭ سەنىمدى وكىلى دوس كوشىم سايلاۋدان شەتتەتۋدىڭ زاڭسىز ەكەنىن اتاپ ءوتتى.

"كونستيتۋسيا بويىنشا ءار ازاماتتىڭ سايلاۋعا تۇسۋگە، سايلانۋعا قۇقىعى بار. ءبىراق وسى قۇقىقتارعا قاراما-قايشى كەلەتىن كەيىن شىققان زاڭدار دا بار. ءبىز اسىلبەك قوجاحمەتوۆتىڭ باعدارلاماسى مەن بۇرىن وپپوزيسيانىڭ باسشىسى بولعاندىقتان سايلاۋدانى الىنىپ تاستالىپ وتىر دەمەيمىز. تەك بىرنەشە قاراما-قايشىلىقتار بايقالاتىنىن ايتقىمىز كەلەدى. ورتالىق سايلاۋ كوميسسياسىنداعى نورماتيۆتىك زاڭدار مەن اكتىلەردى العا تارتىپ، تىركەلگەن كانديداتتاردى الىپ تاستاۋ باستالدى. ءبىزدىڭ سايلاۋ الدى ناۋقانىمىز وسى سەبەپتەن توقتاپ تۇر. ەگەر بۇگىنگە دەيىن كانديدات تىركەۋدەن وتكەن بولسا ونىڭ سايلاۋعا قاتىسۋعا تولىق قۇقى بار"، دەدى دوس كوشىم. 

بۇدان بولەك ساياساتكەر شوقان ءۋاليحانوۆ اۋدانىنداعى مادەنيەت ءۇيىنىڭ باسشىسىن سوتقا بەرىپ جاتقانىن ايتتى: 

"سەبەبى اقشاسىن تولەپ، سول مادەنيەت ۇيىندە كەزدەسۋ وتكىزۋدى جوسپارلادىق. الايدا ولار بىزبەن قاتارلاستىرىپ "امانات" پارتياسىنىڭ كەزدەسۋىن وتكىزگەن. بىردەي ۋاقىتتا، بىردەي ورىندا 2 كەزدەسۋدى بەلگىلەپ قويعان. پارتيا مۇشەلەرىنە قۇجاتتارىمىزدى كورسەتتىك. كەيىن ولار فايەدە كەزدەسۋ وتكىزەتىنىن ايتتى. مەن ەشقانداي قۇجاتسىز كەزدەسۋ وتكىزۋگە بولمايتىنىن ايتىپ، ەسكەرتتىم. بۇل ءبىزدىڭ كەزدەسۋگە كەدەرگى جاساۋ ءۇشىن ادەيى جاسالعان. وسىنداي اياقتان شالۋ وقيعالارى كەزدەسىپ جاتىر. مەنىڭ ويىمشا، مۇنىڭ بارلىعى بۇرىنعى اۋرۋ، بۇرىنعى دەرت جانە بۇرىنعى ماسەلە. جاڭا ادامدار بيلىككە كەلسە شاما كەلگەنشە توقتاتۋعا تىرىسادى. بۇل جاعداي ءالى كۇنگە دەيىن بار. امال جوق، ءوزىمىزدىڭ ءارىز-وتىنىشىمىزدى بەردىك. قانداي ناتيجە شىعاتىنىن ءازىر بىلمەيمىن".