بۇگىن ۇلت كوسەمى، الاش كوشباسشىسى ءاليحان بوكەيحاننىڭ تۋعان كۇنى. 1866 جىلى 5 ناۋرىزدا قارقارالى ۋەزىندە دۇنيەگە كەلگەن ءاليحان نۇرمۇحامەدۇلىنا 157 جىل تولىپ وتىر. 

تاريحشىلاردىڭ ايتۋىنشا، ونىڭ ساياسي قىزمەتى ومبىدا "حالىق بوستاندىعى" پارتياسىنا مۇشە بولعان كەزدەن باستالعان. ءاليحان بوكەيحان باستاعان الاش قايراتكەرلەرىنىڭ ۇلى ارمانى – قازاق مەملەكەتىن قۇرۋ بولدى. 1917 جىلدىڭ شىلدە ايىندا ورىنبوردا وتكەن ءبىرىنشى جالپىقازاقتىق سەزىندە الاش ۇلتتىق ساياسي پارتياسى زاڭداستىرىلدى. بۇل الاش ۇكىمەتىن قۇرۋعا جاسالعان نەگىزگى قادام بولاتىن. 

«Qamshy.kz» اقپارات اگەنتتىگى 2017 جىلدىڭ باسىندا "الاشوردا – 100 جىل" جالپىحالىقتىق شارالارىن ىسكە اسىراتىنىن جاريالادى. الاشتىڭ مەرەيتويى اس بەرۋدەن باستالدى. سول جىلى 5 ناۋرىزدا الماتىداعى احمەت بايتۇرسىنوۆ مۋزەيى الدىندا الاش قوزعالىستىڭ 100 جىلدىعىنا ارنالعان اس بەرىلىپ، دۇعا وقىلدى. شاراعا الاشتانۋشى عالىمدار مەن زيالى قاۋىم وكىلدەرى، جۋرناليستەر قاتىستى. ءساۋىر ايىندا احمەت بايتۇرسىن ۇلى ساياباعىنا «الاشوردانىڭ» 100 جىلدىعىنا ارناپ 100 اعاش وتىرعىزىلدى. قاراشادا الاتاۋ ءداستۇرلى ونەر تەاترىندا وتكەن شارادا "100 جەتىم بالا" مەن "100 قيىنشىلىعى بار ستۋدەنتكە" 4 ميلليون تەڭگە ناقتى قاراجات ءبولىنىپ، كومەك كورسەتىلدى. الاش رۋحىنا ارنالعان شارانىڭ قورىتىندىسى رەتىندە "الاش ارىستارىنىڭ 100 ءىزباسارى" ماراپاتتالدى. شارادا ۇلتقا قىزمەت ەتىپ، ەل ىقىلاسىنا بولەنگەن سان سالانىڭ ۇزدىكتەرىنە "الاش ارىستارىنىڭ ءىزباسارى" مەدالى تابىستالدى.