جۋرناليست ماحامبەت ءابجانعا قاتىستى ۇكىم زاڭدى كۇشىنە ەندى، دەپ حابارلايدى استانا قالاسى سوتىنىڭ باسپا ءسوز قىزمەتى.
بۇعان دەيىن حابارلانعانداي، 2023 جىلعى 3 اقپاندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى باق-تى پايدالانىپ، ءىرى زالال كەلتىرۋگە اكەپ سوققان كورىنەۋ جالعان اقپارات تاراتۋ (قك-نىڭ 274-بابى 3-بولىگى) جانە اسا ءىرى مولشەردە بوپسالاۋ فاكتىلەرى بويىنشا (قك-نىڭ 194-بابى 4-بولىگى 2) تارماعى) ماحامبەت ابجانعا ۇكىم شىعاردى.
ابجان قىلمىستاردىڭ جيىنتىعى بويىنشا 9 جىلعا باس بوستاندىعىنان ايىرۋ جازاسىنا كەسىلدى. ول جازاسىن توتەنشە ءقاۋىپسىز قىلمىستىق-اتقارۋ جۇيەسى مەكەمەسىندە وتەيدى. ابجاننىڭ ىس-ارەكەتىنەن ءقاۋىپتى قىلمىستىڭ قايتالانعانى انىقتالدى.
"سوتتالعان ادام مەن ونىڭ قورعاۋشىلارى وسى ۇكىممەن كەلىسپەي، سوت اكتىسىنە اپەللياسيالىق تارتىپپەن شاعىمدانىپ، ابجاندى اقتاۋدى سۇرادى. سوت اكتىسىنىڭ كۇشىن جويۋعا نەمەسە وزگەرتۋگە نەگىز بولماعاندىقتان، ۇكىم وزگەرىسسىز قالدىرىلدى جانە زاڭدى كۇشىنە ەندى"، - دەپ مالىمدەدى قالالىق سوت.
ەسكە سالساق، سوت انىقتاعانداي، ماحامبەت ءابجان "Abzhan news" تەلەگرامم-كانالىنىڭ يەسى جانە اۆتورى بولعان كەزدە 2022 جىلعى ماۋسىمنان شىلدەگە دەيىن باق-تى پايدالانا وتىرىپ، "استانا-وڭىرلىك ەلەكترجەلىلىك كومپانياسى" اق باسقارما ءتوراعاسىنىڭ ورىنباسارى گ.قوجابايەۆقا، "استانا جىلۋ ءترانزيتى" باسقارما ءتوراعاسىنىڭ ورىنباسارى ك.مۋكينگە جانە راشيت ماحاتقا (جەكە كاسىپكەر) قاتىستى كورىنەۋ جالعان مالىمەتتەر جاريالاعان. سونداي-اق، ول راشيت ماحاتتان 50 ملن تەڭگە اقشا بوپسالاعان.
