الماتىدا وتكەن سايلاۋ ناتيجەسىنە بايلانىستى باسپا ءسوز كونفەرەنسياسىندا رىسبەك سارسەنباي حالىق پارلامەنتىن قۇرۋعا ۇسىنىس تاستادى.
"بۇل سايلاۋدىڭ ادىلەتسىز وتكەنىن كۇشتەپ بولسىن مويىنداتۋىمىز كەرەك. ەگەر توقايەۆ "سايلاۋدى ءادىل ءوتتى"، دەپ تانىسا، بيلىكتەن كەتۋىن تالاپ ەتۋىمىز قاجەت. ءقازىر نايزا كەزەنىپ، دايىن وتىرمىز. توقايەۆ قاتەسىن تۇسىنسە تۇزەتەدى. تۇسىنبەسە، ونى پرەزيدەنت دەپ ەسەپتەي المايمىز. سايلاۋ تۋرالى زاڭ مەن سايلاۋ كوميسسياسىن وزگەرتۋدى تالاپ ەتەيىك! وسىنداي ىستەردى ۇيىمداستىرۋ ءۇشىن بىزگە حالىق پارلامەنتى كەرەك"،– دەپ مالىمدەدى رىسبەك سارسەنبايەۆ.
ول حالىق پارلامەنتىنىڭ قۇرامىنا ەل اراسىندا بەدەلدى، ءسوزىنىڭ سالماعى بار تۇلعالار مەن بولعان جايتتاردى تالداي الاتىن، ۇسىنىس تاستاي الاتىن ادامداردى الۋ كەرەگىن ايتىپ ءوتتى.
"حالىقسىز بيلىك بولمايتىنىن دالەلدەيتىن، ونى ىسكە اسىراتىن ءسات كەلدى. حالىق پارلامەنتى ءۇشىن جۇمىس توبىن قۇرىپ، ارنايى جيىن وتكىزەيىك. ەل سەنەتىن، بۇرىن ەشكىمدى الداماعان، شىندىقپەن جۇرگەن، ءبىلىمدى دە بىلىكتى ادامداردان حالىق پارلامەنتىن قۇرايىق. تەك الماتىمەن شەكتەلمەي، ءارتۇرلى ايماقتارداعى بارلىق ازاماتتارعا ايتايىق" – دەپ ۇندەۋ تاستادى رىسبەك سارسەنبايەۆ.
سونىمەن قاتار رىسبەك سارسەنباي حالىق پارلامەنتىن قۇرۋعا سايلاۋدان جەڭىلگەن ۇمىتكەرلەر دا قارسى ەمەس ەكەنىن ءمالىم ەتتى. ولاردىڭ قاتارىندا سانجار بوقايەۆ، ورازالى ەرجانوۆ، ينگا يمانباي، ەسەنعازى قۋاندىق، مۇحتار تايجان دا بار.
پىكىر قالدىرۋ