بۇگىن استانانىڭ سارىارقا اۋداندىق №2 سوتىندا قايرات بورانبايەۆ سوڭعى ءسوزىن سويلەدى، دەپ حابارلايدى informburo.kz

"وكىنىشكە وراي، پروكۋرورلاردىڭ ءوز قاتەلىگىن مويىنداۋعا باتىلى جەتپەدى. ءبىراق سوتتىڭ وسى قاتەلىكتەردى تۇزەتىپ، ادىلدىك پەن زاڭ ۇستەمدىگىن قالپىنا كەلتىرۋگە باتىلى جەتەدى دەپ ۇمىتتەنەم. كەشە پرەزيدەنت ادام قۇقىعى ماسەلەسىن كوتەرىپ، ءار ادامنىڭ ءوز قۇقىعىن قورعاي الاتىنىن سەنىمدى بولۋى مەن سوتتىڭ ادىلدىگىنە كۇماندانباۋى ماڭىزدى ەكەنىن ايتتى"–  دەدى قايرات بورانبايەۆ.

سونداي–اق ول "ازياگازچۋندجا" جانە "Qazaq Gaz" اراسىنداعى مامىلەدەن مەملەكەتكە شىعىن كەلگەن بولسا، وتەۋگە دايىن ەكەنىن جەتكىزدى.

ەسكە سالا كەتەيىك، قايرات بورانبايەۆقا قاتىستى سوت وتىرىسى بىلتىر 30 جەلتوقساندا باستالعان ەدى.

28 ناۋرىزدا وتكەن سوت وتىرىسىندا پروكۋرور قايرات بورانبايەۆتى 8 جىلعا باس بوستاندىعىنان ايىرىپ، مۇلكىن تاركىلەۋدى سۇراعان بولاتىن.