ماڭعىستاۋ وبلىسى جەتىباي اۋىلىندا مۇناي–گاز سالاسىنا جۇمىسقا الۋدى تالاپ ەتىپ، جولدى جاۋىپ تۇرعان تۇرعىندارمەن قۇرىلىس كومپانيالارىنىڭ باسشىلارى كەزدەسىپ، جۇمىسقا شاقىردى، دەپ حابارلايدى informburo.kz

قۇرىلىسشىلار تۇرعىندارعا ءارتۇرلى جۇمىس ورىندارىن ۇسىنعان. ولاردىڭ قاتارىندا ماشينيست، ەلەكتريك، سلەسار، ۋچاسكە بريگاديرى، اسفالت توسەۋشى، بۋلدوزەر ءماشينيسى، جۇرگىزۋشىسى، جۇك تاسۋشى، كىرپىش قالاۋشى، سىلاقشى سىندى ماماندىقتار بار.

"قاجەت ماماندار اراسىندا ەڭ تومەنگى جالاقى 223 000 تەڭگە بولسا، ەڭ جوعارعىسى 450 000 تەڭگە"، – دەلىنگەن حابارلامادا.

"اليانس لتد"  ج ش س ديرەكتورى اسقار كەرەلبايەۆ ماڭعىستاۋدا قۇرىلىس ماۋسىمى ۇزاق بولعاندىقتان، تۇراقتى جۇمىس ورىندارى ۇسىنىلىپ وتىرعانىن اتاپ ءوتتى. 

"سىزدەرگە جۇمىس كەرەگىن ەستىپ، كومەكتەسۋدى، تۇراقتى جۇمىس ورىندارىن ۇسىنۋدى شەشتىك. اتالعان جۇمىسقا ورنالاسۋ ارنايى ءبىلىمدى قاجەت ەتپەيدى، ءارى بىلىكتىلىك ارتتىرۋعا دا كومەكتەسەمىز. ءبىزدىڭ كومپانيالاردا 15 كۇندىك ۆاحتالىق ادىسپەن جۇمىس جاساي الاسىزدار. وكىنىشكە وراي، مۇناي سالاسىندا بارلىعىن بىردەي جۇمىسپەن قامتۋ مۇمكىن ەمەس، سوندىقتان باسقا جۇمىس ورىندارىن ۇسىنامىز"، – دەدى اسقار كەرەلبايەۆ.

الايدا جينالعاندار مۇناي سالاسىنا جۇمىسقا تۇرعىزۋدى تالاپ ەتىپ، شاقىرتۋدان باس تارتقان.

ەسكە سالا كەتەيىك، وسىعان دەيىن نارازىلىق بىلدىرۋشىلەر اراسىندا 14 ادام اشتىق جاريالاعان بولاتىن.