وتكەن اپتادا پەتروپاۆلدا قۇرىلعان سەپاراتيستىك ۇيىمنىڭ ۆيدەوسى تاراپ، الەۋمەتتىك جەلىدە شۋ شىعاردى. كەيىن ۇيىم مۇشەلەرىنىڭ قازاقستاندىقتاردان كەشىرىم سۇراعان ۆيدەوسى تاراعان بولاتىن. وسى ورايدا قوعام بەلسەندىسى ارمان شورايەۆ مۇحتار تايجاننىڭ Youtube ارناسىنا سۇحبات بەرىپ، سەپاراتيستىك ۇيىمدار جايلى پىكىرىن ايتتى.

"بۇعان دەيىن سەپاراتيستەر ءار جەردەن ءبىر ءۇن شىعاراتىن. ءبىراق ىشكى ورگاندار بۇعان اسا ءمان بەرگەن جوق. جۋىردا اتباساردا ءبىر جىگىت "ەگەر رەسەي شابۋىل جاساسا، مەن قازاقستانعا قارسى شىعام" دەدى، ءبىراق وعان قارسى ەشقانداي شارا قولدانىلمادى. سونىڭ ناتيجەسىندە پەتروپاۆلداعى وقيعا ورىن الدى. سەپاراتيستەر ايتارىن ايتادى دا، ەكىنشى كۇنى جىلامسىراپ كەشىرىم سۇراپ تۇرادى. ۆيدەودا 20 شاقتى ادام قاۋىمداسقان توپ بولىپ وتىر. ءبىر–ءبىرىن تانىعانىنا ءبىر كۇن بولماعان شىعار، ولار ارام پيعىلدارىن بىرنەشە اي نەمەسە بىرنەشە جىل ورتاعا قويىپ اقىلداسىپ، بىرىگىپ ارەكەت جاساعان. مەنىڭشە، بۇل قىلمىستىق توپتىڭ ءبارىن ءبىر ادامداي سوتقا تارتىپ، جازالاۋ كەرەك"– دەدى ول.

سونىمەن قاتار، ارمان شورايەۆ سەپاراتيستىك توپتاردىڭ ارتىندا رەسەي تۇرعانىن ءمالىم ەتتى.

"بۇنداي توپتىڭ ارتىندا رەسەيدىڭ قۇلاعى كورىنىپ تۇر دەسەم قاتەلەسپەسپىن. ويتكەنى بىزدە ەلشىلىكتەن باسقا "روسسوترۋدنيچەستۆو" دەگەن سەپاراتيستەردى ىشتەي قولداپ جۇرگەن مەكەمە بار. ءبىز بىلمەيتىن اگەنتتىكتەر قانشاما. پەتروپاۆلداعى ۇيىم – رەسەيدىڭ ارام پيعىلىنىڭ ناتيجەسى. ەگەر ءبىزدىڭ ماجىلىستە، ءماسليحاتتا نە اكىمدەردىڭ ىشىندە نامىستى ازاماتتار وتىرسا، باياعىدان بەرى بۇندايلاردىڭ ءۇنىن وشىرەر ەدى. وكىنشىكە قاراي، ءبىزدىڭ ۇكىمەتتەگىلەر – رەسەيدىڭ ماريونەتكالارى. ءۇنسىز ۇكىمەتتىڭ، ءۇنسىز دەپۋتاتتاردىڭ كەسىرىنەن وسى جاعدايعا جەتتىك"  – دەپ مالىمدەدى ول.

سۇحبات بارىسىندا ءتىل ماسەلەسىن تىلگە تيەك ەتكەن ارمان شورايەۆ جاڭا دەپۋتاتتاردان ءتىل ماسەلەسىن شەشۋدى كۇتەتىنىن دە ايتتى.  

"ۇلتجاندى ازاماتتاردى ساياسي تۇتقىن ەتكەن ءبىزدىڭ بيلىك سەپاراتيستەردىڭ باس كوتەرۋىنە ىقپال جاسايتىن كرەمل ساياساتىن  قولداپ كەلە جاتىر. بىزدە ۇلتتىق يدەولوگيا جوق. مەنىڭشە، ۇلتتىق يدەولوگيا ارحيۆىمىزدەن باستالادى. باسشىلارى باسقا تىلدە سويلەگەن قاي ەلدى كوردىڭىز؟ قازاق ءتىلى تورگە وتىرماي، باسشىلار قازاق تىلىندە سويلەمەي، ەل بولا المايمىز. ءبىز ءالى كۇنگە رەسەي فەدەراسياسىنىڭ كولونياسىمىز. انا ءتىلىمىز ەسىكتەن سىعالاپ تۇرعاندا، "ورىس ءتىلى جىلىن" جاريالاۋ – ۇيات نارسە. بىزدە ۇلتتىق يدەولوگيا جوق. جاقىن ارادا بولمايدى دا" – دەپ حابارلادى ارمان شورايەۆ.

سونىمەن قاتار ول جەر ماسەلەسىن كوتەرىپ، رەسەي مەن جۇڭگو سياقتى شەكارالاس ەلدەر كومپانيالارىنا شەكارا ماڭىنان جەر بەرىلمەۋى كەرەگىن ايتتى.