بۇل كوشەدەن ءجۇرىپ وتكەن ەكى كولىك جۇرگىزۋشىنىڭ ءبىرى بۇرىنعى اكىم باۋىرجان بايبەكتى مىندەتتى تۇردە ەسكە الادى. ءيا، بۇل – وزىڭىزگە جاقسى تانىس تيميريازيەۆ كوشەسى. جەڭىل كولىكتەر تەك ءبىر جولاقپەن جۇرگەندىكتەن، تاڭعى جانە كەشكى ۋاقىتتاردا كوشەنىڭ بويى قاپتاعان كولىك، كەپتەلىس بولادى. جەڭىل كولىكتەر ءۇشىن قولايسىز بولعاندىقتان جول كولىك اپاتتارى ءجيى بولىپ تۇرادى.

بۇگىن ءتۇسىرىلىم توبىمەن بىرگە وسىنداي وقيعاعا تاپ بولدىق. اسىققان جەڭىل كولىك پەن قوعامدىق كولىك جۇرگىزۋشىلەرى باعدارشام قيىلىسىندا بىر-بىرىنە جول بەرمەي، سالدارى جكو اكەپ سوقتى. 2018 جىلى الماتى قالاسىنىڭ ەكس-اكىمى تيميريازيەۆ كوشەسىنىڭ بويىنا BRT جەلىسىن ەنگىزگەندە، جەرگىلىكتى ب ا ق وكىلدەرى  ءقاۋىپتى جول اپاتتارى بولۋى ىقتيمالدىعىن قوزعاعان. ونىڭ ۇستىنە، كەزىندە ستاندارتتاردى بۇزىپ سالىنعان BRT جۇيەسى كەپتەلىس ماسەلەسىن شەشكەن جوق.

ورتاداعى قوس جولاقتا قوعامدىق كولىكتەرگە ارنالعان. وزدەرىنە جول اشىلعانىنا قاراماستان جەڭىل كولىكتىڭ جالعىز جولاعىنا ءجيى ءوتىپ كەتە بەرەتىن ولاردىڭ پىكىرى باسقا.

ايتىپ كەتكەنىمىزدەي، كەپتەلىس ماسەلەسى BRT-مەن شەشىلمەگەن. كولىك كەپتەلىسىمەن قوسا، قاق ورتاسىندا قالتالى ايالداماسى بار بۇل كوشەدەن ەكى مەزگىل ادام كەپتەلىسى دە ارىلمايدى.

تيميريازيەۆ بويىنداعى بۇل احۋالدىڭ كۇردەلىلىگىن قالانىڭ قازىرگى اكىمى ەربولات دوسايەۆتىڭ ءوزى دە مويىنداپ ەدى. ءتىپتى، ورتاداعى قوعامدىق كولىك جولاعىن ەكى شەتكە اۋىستىرۋى مۇمكىن ەكەنىن مالىمدەگەن. ماسەلەنى شەشۋ ءۇشىن، وزگەرىس ەنگىزۋ تۋرالى شەشىم قابىلداناتىنىن دا ايتتى. الايدا ازىرگە قاشان، قالاي، بەلگىسىز بوپ تۇر.

ەستەرىڭىزگە سالا كەتەيىك، الماتىدا BRT باستاپقىدا ستاندارتقا قايشى سالىنعان بولاتىن. ستاندارت بويىنشا، ءبىر باعىتتاعى كولىك قوزعالىسى ءۇشىن ءۇش جولاقتان از بولاتىن كوشەلەردە بولىنگەن جولاقتاردى ۇيىمداستىرۋعا تىيىم سالىنعان.

وسىعان بايلانىستى قامشى پورتالى الماتى قالاسىنىڭ اكىمى ەربولات دوسايەۆقا رەسمي ساۋال جولدادى. الداعى ۋاقىتتا قالا اكىمىنىڭ جاۋابىن جاريالايتىن بولامىز.