بۇگىن ق ر پارلامەنت ءماجىلىسىنىڭ جالپى وتىرىسى ءوتتى. ءماجىلىس دەپۋتاتى ەرمۇرات باپي تومەنگى پالاتاداعى العاشقى ساۋالىن قازاقستانداعى سەپاراتيستىك ارەكەتتەر مەن ساياسي تۇتقىندار ماسەلەسىن كوتەرۋدەن باستادى. 

"سەپاراتيزم سيپاتىنداعى وعاش وقيعا قازاقستانداعى ۇلتتىق جىكشىلدىكتىڭ وتە ءقاۋىپتى ەكەنىن تاعى ءبىر رەت كورسەتتى. ءبىزدىڭ ەلدىڭ نامىسىن قورعاعان ۇلتجاندى ازاماتتار – مارعۇلان بورانبايەۆ پەن دانات نامازبايەۆ ۇلتارالىق نارازىلىق قوزدىردى دەگەن جەلەۋمەن ءارقايسى 5 جىلعا سوتتالىپ كەتتى. بۇل قاتارعا ەرمەك نارىمبايەۆتى دا قوسۋعا بولادى. انىعىندا بۇل ازاماتتار ۇلتارالىق ارازدىقتان بۇرىن الەۋمەتتىك جەلىلەردەگى سەپاراتيستىك كوزقاراستارعا قارسى شىققانى ءۇشىن سوتتالدى. ولارعا ورەسكەل قيانات جاسالدى. ءبىر ەل ءوزىنىڭ سىڭار ەزۋ ساياساتشىلارىنا تىيىم سالمايدى؟ ال ءبىزدىڭ ەل ءوزىنىڭ ەلدىك مۇددەسى مەن حالىقتىق نامىسىن قورعاعان ازاماتتاردى سوتتايدى" – دەدى ول. 

سونىمەن قاتار، ەرمۇرات باپي كورشى ەلدىڭ ۇرانشىلارى قىلمىستىق سوتقا تاعىلماق تۇگىلى ءوز ەلىنىڭ بيلىگىنەن ەسكەرتۋ دە الماعانىن ايتتى. ول بۇل جاعدايدى  قازاقستانداعى وقيعامەن سالىستىرىپ، ەل نامىسىن قورعاعان ازاماتتاردىڭ نەگە سوتتالعانىن سۇرادى. 

"حالىقارالىق ۇيىمدار بۇل ازاماتتاردى ساياسي تۇتقىن تىزىمىنە ەنگىزگەن. بىزگە بۇل كەرەك پە؟ ەندەشە بۇعان دەيىن قازاقستاندا بولىپ كەلگەن سەپاراتيزم سيندرومىن ەسكەرە وتىرىپ، مارعۇلان بورانبايەۆ پەن دانات نامازبايەۆقا قاتىستى ۇكىمدى قايتادان قارايتىن ۋاقىت تا، ساياسي سەبەپ تە، ۇلتتىق قاۋىپسىزدىك مۇقتاجدىعى دا تۋدى دەپ ەسەپتەيمىن. ازاماتتىق مىنەز كورسەتەتىن ۋاقىت كەلدى" – دەپ مالىمدەدى دەپۋتات. 

سونداي اق، ەرمۇرات باپي باس پروكۋروردان مارعۇلان بورانبايەۆ پەن دانات نامازبايەۆقا قاتىستى قىلمىستىق ءىستىڭ زاڭ تالاپتارىنا ساي قايتا قاراۋىن سۇرادى.

ول بۇل ساۋالىنان دەپۋتات ابزال قۇسپان دا قوسىلاتىنىن اتاپ ءوتتى.

ەسكە سالا كەتسەك، بىلتىر ناۋرىزدا بلوگەرلەر مارعۇلان بورانباي مەن دانات نامازباي Facebook جەلىسىندەگى جازبالارى ءۇشىن 5 جىلعا قاماۋعا الىندى. سوت شەشىمىنە سايكەس، ايىپتالۋشىلار 2018 جىلدان باستاپ الەۋمەتتىك جەلىدەگى پاراقشالارىندا ۇلتارالىق الاۋىزدىقتى قوزدىرۋ ماقساتىندا جازبا جاريالاپ، ورىس ۇلتى وكىلدەرىن كەمسىتكەن.