Forbes جۋرنالى الەمدەگى ەڭ باي ادامدار ءتىزىمىن جاريالادى. ولاردىڭ اراسىندا قازاقستاندىقتار دا بار.

Forbes جۋرنالىنىڭ بايلار تىزىمىنە ەنگەن قازاقستاندىقتاردىڭ كوپشىلىگى ەكس–پرەزيدەنت نۇرسۇلتان نازاربايەۆتىڭ جاقىن ادامدارى مەن ونىڭ تىكەلەي تۋىستارى. ولاردىڭ ءبارى نازاربايەۆ بيلىكتە تۇرعاندا بايىعان، دەپ جازادى ازاتتىق راديوسى.

♦جۋرنال تىزىمىنە ەنگەن قازاقستان ازاماتتارىن كوشىن 591 ءشى قاتارداعى ۆلاديمير كيم باستاپ تۇر. ونىڭ بايلىعى 4،3 ميلليارد دوللاردى قۇرايدى. جۋرنال وتكەن جىلمەن سالىستىرعاندا "قازاقمىس" كورپوراسياسىنىڭ اكسيالارىنىڭ باسىم بولىگىن جانە "KAZ Minerals" اكسيونەرلىك قوعامىنىڭ ۇلەسىن يەلەنەتىن كيمنىڭ كىرىسى ازايىپ، كومپانياداعى ورنىن جوعالتقانىن ايتتى. ول 2022 جىلى 5 ميلليارد دوللار بايلىعىمەن 552 ءشى ورىنعا جايعاسقان ەدى.

♦Forbes جۋرنالىنىڭ مالىمەتىنشە، ەكس–پرەزيدەنت نۇرسۇلتان نازاربايەۆتىڭ قىزى دينارا قۇلىبايەۆا مەن ونىڭ كۇيەۋى تيمۋر قۇلىبايەۆتىڭ كاپيتالى ءبىر ميلليارد دوللارعا وسكەن. وتكەن جىلى ەرلى–زايىپتىلاردىڭ ءارقايسىسىنىڭ تابىسى 3،8 ميلليارد دوللار بولسا، بيىل، 4،3 ميلليارد دوللارعا جەتكەن. ولار رەيتينگتەن 636 شى ورىن الدى.

♦ال Kaspi Bank يەلەرىنىڭ ءبىرى ۆياچەسلاۆ كيم 1513 ورىننان  787 ءشى ورىنعا كوتەرىلگەن. ونىڭ بايلىعى وتكەن جىلى 2 ميلليارد دوللاردى قۇراسا، بيىل ەكى ەسەگە كوبەيىپ، 3،6 ميلليارد دوللارعا جەتكەن.

♦Freedom Holding بروكەرلىك كومپانياسىنىڭ باسشىسى تيمۋر تۋرلوۆ 1292 ورىننان  949 ورىنعا كوتەرىلدى. ونىڭ بايلىعى وتكەن جىلى 2،4 ميلليارد دوللار بولسا، بيىل 3،1 ميلليارد دوللارعا وسكەن.

♦بۇرىنعى پرەزيدەنت نۇرسۇلتان نازاربايەۆتىڭ جاقىندارىنىڭ ءبىرى 65 جاستاعى بولات وتەمۇراتوۆ رەيتينگتەگى 1096 شى ورىنىنان 1104 ورىنعا تۇسكەن. Forbes ونىڭ بايلىعىنىڭ 2،8 ميللياردتان 2،7 ميلليارد دوللارعا تومەندەگەنىن ايتتى.

ەسكە سالا كەتەيىك، Forbes ءتىزىمىنىڭ العاشقى ۇشتىگىندە بەرنارد ارنو، يلون ماسك پەن دجەفف بەزوس تۇر.