بۇگىن ءۇيقاماقتا وتىرعان جانبولات ماماي سوتتاعى سوڭعى ءسوزىن سويلەدى. ول وزىنە تاعىلعان ايىپتاردىڭ شىندىققا جاناسپايتىنىن ايتىپ، قارسى تاراپ بىردە–ءبىر دالەل كورسەتە الماعانىن مالىمدەدى.
سوت وتىرىسىندا جانبولات ماماي ءوزىن "دەموكراتيالىق پارتيا" جەتەكشىسى ءارى ۇلتجاندى ازامات رەتىندە تانىستىردى.
"الىپ مەملەكەتتە نەبارى 20 ميلليون ادام تۇرامىز. بۇل قىتايدىڭ ءبىر-اق قالاسىنىڭ تۇرعىندارىمەن تەڭ. سول 20 ميلليون ادامنىڭ ۇلان عايىر جەرى مەن مول بايلىعى بار. الايدا ولار گۇلدەنگەن مەملەكەتتە ءومىر ءسۇرۋ ورنىنا كەدەيلىكتىڭ شەگىنە جەتتى. شىندىقتى اشىق ايتقانىم ءۇشىن مەنى سوتتاعاننان ەشتەڭە وزگەرمەيدى. ءبىز حالىقتىڭ مۇڭ-مۇقتاجىن ايتقانداردى قۋدالاعانشا، سول ماسەلەلەردىڭ شەشۋ جولىن ىزدەۋمىز كەرەك"– دەدى ول.
سونىمەن قاتار، جانبولات ماماي قاڭتار وقيعاسىنىڭ شىنايى باعاسىن بەرەتىن ۋاقىت كەلگەنىن دە ايتتى.
"قاندى قاڭتار كەزىندە ءبىر جىگىتتىڭ 30 سامسا ۇرلاعانى ءۇشىن تەرگەۋ يزولياتورىنا تۇسكەنىن ەستىدىم. ۆەلوسيپەد نەمەسە موپەد ۇرلاپ سوتتالعاندار دا بولدى. ءيا بۇل قىلمىس جانە جاۋاپقا تارتۋ دۇرىس. ءبىراق قىلمىس پەن جازا بىر-بىرىنە ساي بولۋ كەرەك. بىرەۋ 30 سامسا ءۇشىن سوتتالسا 30 جىل ەلدى توناعاندار جاۋاپقا تارتىلمايدى. نەگە ايىپتالعاندار اراسىندا ميلياردتاعان قاراجاتتى جىمقىرعان جەمقورلار جوق؟"– دەپ ءمالىم ەتتى ول.
جانبولات مامايدىڭ ءىسى بويىنشا سوت ۇكىمى 10 ءساۋىر تاڭەرتەڭ وقىلادى.
ەسكە سالا كەتەيىك، وسىعان دەيىن پروكۋرور جانبولات مامايدى 6،6 جىلعا سوتتاپ، جۋرناليستتىك جانە قوعامدىق قىزمەتپەن اينالىسۋىنا تىيىم سالۋدى سۇراعان ەدى.
ال رىسبەك سارسەنبايەۆ پروكۋرور سۇرانىسىن "پرەزيدەنتكە تابان تىرەسىپ قارسىلاساتىن ادامدى ساياسي ارەناعا شىعارماۋدىڭ ەسەبى، بيلىكتىڭ قىلمىسىن اشكەرەلەمەۋدىڭ امالى" دەپ باعالاعان بولاتىن.
پىكىر قالدىرۋ