الەۋمەتتىك جەلىدە جاڭا سايلانعان دەپۋتاتتار ەرمۇرات باپي، رينات زايىتوۆ جانە ماقسات تولىقبايدىڭ استانا قالاسىندا نارازىلىق جاساعان جاڭاوزەندىكتەرمەن سويلەسكەن ۆيدەوسى تارادى. 

ءجۋرناليستىڭ "جاڭاوزەندىكتەر كەشەدەن بەرى پيكەت وتكىزدى. نەگە كەشەدەن بەرى كەلمەدىڭىزدەر؟ نە سەبەپتى بۇگىن عانا كەلىپ وتىرسىزدار؟" دەگەن سۇراعىنا ەرمۇرات باپي جاۋاپ بەردى. 

"ءبىز ەرتەرەك كەلگەندە شارۋا شەشىلىپ كەتەر مە ەدى؟ جاڭاوزەندىكتەردىڭ كەلگەنىن تۇستەن كەيىن عانا ەستىدىم"، دەدى ەرمۇرات باپي. 

ال رينات زايىتوۆ بولسا "ماسەلە مىنا جەردە شەشىلمەيدى، كابينەتتە شەشىلەدى، جىگىتتەر. نەگىزىندە كابينەتتە شەشىلۋى كەرەك. ال تالاپ ەتۋشىلەردىڭ وسى ارەكەتى پروسەستى الدەقايدا جەدەلدەتەدى"، دەپ ايتتى. 

ەسكە سالا كەتسەك 11 ساۋىردە ءبىر توپ جاڭاوزەندىكتەر استانا قالاسىنداعى ەنەرگەتيكا مينيسترلىگى عيماراتىنىڭ جانىندا پيكەت ۇيىمداستىرعان بولاتىن. ولاردىڭ نارازىلىققا شىعۋىنا جۇمىسسىزدىق سەبەپ بولعان. نارازىلىققا شىققان جاڭاوزەندىكتەر ءتۇنى بويى كوشەدە بولعان.  "بەرالى ماڭعىستاۋ" كومپانياسى تەندەردەن ۇتىلىپ، بارلىعى جۇمىس ورىندارىنان ايىرىلعان.

سونداي-اق ءبىر توپ جاڭاوزەندەگى اكىمشىلىك الدىنا جينالعان ءبىر توپ تۇرعىندار ۆيدەوۇندەۋ جاسادى. ولار استاناداعى مۇنايشىلاردىڭ بوساتىلۋىن تالاپ ەتتى.