جاڭاوزەندىك مۇنايشىلار 12 ءساۋىر كۇنى تاڭعى پويىزبەن ماڭعىستاۋعا جول تارتتى.
"كەلىسسوز جالعاسادى، 10 ادام قالدى. بار ايتا الاتىنىم وسى" – دەپ حابارلادى نارازىلىققا شىققان مۇنايشىلار بەلسەندىسى ەسەنجان احمەتجان.
جاڭاوزەندىكتەردى ماڭعىستاۋعا جىبەرۋ ءۇشىن استانا–ماڭعىستاۋ باعىتىندا جۇرەتىن تاڭەرتەڭگى پويىزعا ءۇش ۆاگون قوسىلعان. پويىز جەرگىلىكتى ۋاقىت بويىنشا ساعات توعىزدا ماڭعىستاۋعا جول تارتتى، دەپ حابارلادى ازاتتىق راديوسى.
“قازمۇنايگاز” كومپانياسى “بەرالى ماڭعىستاۋ Company” وكىلدەرىمەن ارنايى جۇمىس توبى قۇرىلعانىن ايتتى. جۇمىس توبىنا مۇنايشىلار جاعىنان قالعان 10 ادام كىرگەن. ولار مۇنايشىلاردىڭ تالاپتارىن قارايدى.
ەسكە سالا كەتسەك 11 ساۋىردە ءبىر توپ جاڭاوزەندىكتەر استانا قالاسىنداعى ەنەرگەتيكا مينيسترلىگى عيماراتىنىڭ جانىندا پيكەت ۇيىمداستىرعان بولاتىن. ولاردىڭ نارازىلىققا شىعۋىنا جۇمىسسىزدىق سەبەپ بولعان. "بەرالى ماڭعىستاۋ" كومپانياسى تەندەردەن ۇتىلىپ، بارلىعى جۇمىس ورىندارىنان ايىرىلعان مۇنايشىلار ەنەرگەتيكا مينيسترلىگىنىڭ الدىنا تۇنەگەن. ولاردى كەشە پوليسيا بولىمشەسىنە الىپ كەتكەن بولاتىن.
سونداي-اق جاڭاوزەندەگى اكىمشىلىك الدىنا جينالعان ءبىر توپ تۇرعىندار ۆيدەوۇندەۋ جاسادى. ولار استاناداعى مۇنايشىلاردىڭ بوساتىلۋىن تالاپ ەتتى. كەيىننەن مۇنايشىلاردىڭ بوساتىلۋىن تالاپ ەتكەندەر سانى ارتىپ، الەۋمەتتىك جەلىدە ۆيدەوۇندەۋلەر تاراپ كەتتى.
پىكىر قالدىرۋ