قوعام بەلسەندىسى، ساياساتكەر مۇحتار تايجان الەۋمەتتىك جەلىدەگى پاراقشاسىندا ۇيىنەن پوليسيا الىپ كەتكەنىن حابارلادى. پوليسيا ونى 9 ساۋىردە حالىقتىق پارلامەنتتىڭ سايلاۋ ناتيجەلەرىنە قارسى ۇيىمداستىرعان ميتينگى ءۇشىن 488 باپپەن ايىپتاعان.
ال استانادا ۇستالعان جاڭاوزەندىك مۇنايشىلارعا قولداۋ بىلدىرگەن ساياساتكەر نۇرجان التايەۆتى سوت "جۇرتتى ميتينگىگە شاقىرىپ، بەيبىت شارالار وتكىزۋ زاڭىن بۇزدى" دەگەن ايىپپەن 15 كۇنگە قاماۋ تۋرالى شەشىم شىعارعان.
نۇرجان التايەۆ الەۋمەتتىك جەلىدە ۆيدەو جاريالاپ، جۇرتتى استانا قالاسى الماتى اۋداندىق پوليسيا باسقارماسىنا شاقىرعان ەدى.
بۇل باسقارمادا ەنەرگەتيكا مينيسترلىگى الدىندا ۇستالعان جاڭاوزەندىكتەردىڭ ءبىر توبى وتىرعان. التايەۆتىڭ ءوزى دە وسى باسقارماعا كەلىپ، ۇستالعان مۇنايشىلاردىڭ جاعدايىن بىلمەك بولعان.
سوت ساياساتكەردىڭ بۇل ارەكەتىن "بەيبىت ميتينگ وتكىزۋ زاڭىن بۇزۋ" دەپ تاپقان. التايەۆ اپەللياسيالىق شاعىم تۇسىرمەك. مۇحتار تايجانعا قاتىستى رەسمي اقپارات ازىرگە جاريالانبادى.
پىكىر قالدىرۋ