بۇگىن دەپۋتات ەدىل جاڭبىرشين ماجىلىستە ماڭعىستاۋداعى ماسەلەنى كوتەردى. ول باتىس وڭىرلەردەگى  مۇناي-گاز كاسىپورىندارىندا قىزمەت كورسەتەتىن سەرۆيستىك كومپانيالار جۇمىسشىلارىنىڭ ەرەۋىلى جيىلەگەنىن ايتىپ، ايماقتاعى وزەكتى ماسەلەلەردى شەشۋدى تالاپ ەتتى. 

"كەشەگى سايلاۋالدى ۇگىت-ناسيحات كەزىندە بىرنەشە سەرۆيستىك كومپانيالار «سامۇرىق-قازىنا» ءال-اۋقات قورىنىڭ» ەرەجەلەرىنىڭ تالاپتارىنىڭ ەسكىرگەنىن جانە قازىرگى جاعدايعا سايكەس كەلمەيتىنىن ايتىپ، شاعىمدانعان بولاتىن. الايدا جىل سايىن وتەتىن تەندەرلەردىڭ كەسىرىنەن كونتراكت الا-الماي قالسا نەمەسە باعا دەمپينگىسىنەن كونتراكت سوماسى ەداۋىر تومەندەسە 90% جۇمىسشىلارى جۇمىسسىز قالايىن دەپ وتىر. مۇنداي مىسالداردى كوپتەپ كەلتىرۋگە بولادى"، دەدى ەدىل جاڭبىرشين.

بۇدان بولەك دەپۋتات بۇعان دەيىن دە ماڭعىستاۋداعى جۇمىسسىزدىققا قاتىستى ماسەلە كوتەرىلگەنىن، الايدا جەرگىلىكتى اتقارۋشى بيلىك تاراپىنان جۇيەلى جۇمىس جاسالىنباعانىن ايتتى. 

"ماڭعىستاۋدا جارىلايىن دەپ تۇرعان "جارا" كوپ. ولاردى كەشەندى تۇردە «ەمدەۋمەن» اينالىسپاسا، داۋ-داماي ءارى قاراي جالعاسىپ، ۋشىعا بەرەدى. ۇكىمەت كوميسسياسىن قۇرۋ جونىندە سىزگە حات تا جولدادىق. وعان ءالى جاۋاپ بەرمەدىڭىز. قاشانعى كوزدى جۇمىپ، قۇلاقتى بىتەپ، اۋىزدى بۋىپ وتىرا بەرەسىزدەر؟! ماسەلەنى شەشەتىن ۋاقىت ءوتىپ بارا جاتىر. ەرتەڭ، "قولىمىزدى مەزگىلىنەن كەش سەرمەدىك"  دەپ جۇرمەڭىزدەر"، دەدى دەپۋتات. 

سونداي-اق ەدىل جاڭبىرشين تەندەرلەردىڭ ادىلەتسىز ءوتۋى، جەمقورلىق، تاريفتەردىڭ تومەندىگى، باعا دەمپينگىسى سەكىلدى ماسەلەلەر جۇمىسسىزدىقتى جويۋعا كەدەرگى كەلتىرىپ وتىرعانىن ايتىپ ءوتتى. 

ءسوز سوڭىندا دەپۋتات كونستيتۋسياعا سايكەس ەلىمىزدىڭ بايلىعى حالىققا تيەسىلى، ياعني قازبا بايلىق تۇرعىنداردىڭ ءال-اۋقاتىن ارتتىرۋعا قىزمەت ەتۋى كەرەك ەكەنىن ايتتى.

"سوندىقتان «سامۇرىق-قازىنا» ءال-اۋقات قورى» جانە ونىڭ پورتفەلدىك كومپانيالارى جاڭاشا، اشىق، ءادىل جۇمىس جاساپ، حالىقتىڭ تۇرمىس-تىرشىلىگىن جاقسارتۋعا ناقتى قادامدار جاساسىن"،- دەدى دەپۋتات.