بۇگىن الماتى قالاسىدا حالىقتىق پارلامەنت وكىلدەرى باسپا ءسوز كونفەرەنسياسىن وتكىزدى. اتالعان شاراعا حالىقتىق پارلامەنت وكىلدەرى جىبەك امەنوۆا، باتىر ادايبايەۆ جانە جارقىن كۋرەنتايەۆ قاتىستى.
زاڭگەر، قوعام بەلسەندىسى اتالعان باسپا ءسوز كونفەرەنسياسى باتىر ادايبايەۆ جاڭاوزەندەگى جانە الماتىداعى وقيعاعا بايلانىستى ءوتىپ جاتقانىن ايتتى.
"بۇگىن اياق استىنان حپ مۇشەسى مۇحتار تايجان ۇستالدى. ماڭعىستاۋ مۇنايشىلارىنىڭ تالاپتارىن قولدايمىز. ولارعا بيلىك قولدانعان كۇش زاڭسىز دەپ ەسەپتەيمىز. حپ رەتىندە، قوعام بەلسەندىسى رەتىندە كۇش قولدانۋ زاڭسىز دەپ تانىلۋى كەرەك دەپ ەسەپتەيمىز. التايەۆ پەن تايجاننىڭ ۇستالۋى دا زاڭسىز دەپ ەسەپتەپ، قارسىلىعىمىزدى بىلدىرەمىز"، دەدى زاڭگەر.
قوعام بەلسەندىسى جارقىن كۋرەنتايەۆ جۋرناليستەردىڭ رىسبەك سارسەنبايۇلىنا قاتىستى سۇراعىنا جاۋاپ بەردى.
"بۇعان دەيىن رىسبەك سارسەنباي ۇلى حالىقتىق پارلامەنت جاساعان ميتينگكە جاۋاپكەرشىلىك الاتىنىن ايتقان بولاتىن. ءبىراق بيلىك رىسبەك سارسەنبايۇلىن ۇستاۋدان قورقىپ، ادەيى تايجاندى الىپ كەتتى"، دەيدى ول.
سونداي اق ولار حالىقتىق پارلامەنت جۇمىسىن توقتاتپايتىنىن، ءقازىر ءبىر توپ حالىقتىق پارلامەنت وكىلى الاڭعا جينالىپ جاتقانىن ايتتى.
"جاڭاوزەن جىگىتتەرىن قاماعان كەزدە كۇنى بويى مينيستر قورقىپ، تىعىلىپ، حالىقتىڭ الدىنا شىققان جوق. ەگەر سول كەزدە مينيستر قورىقپاي حالىق الدىنا شىعىپ، بۇكىل جاۋاپكەرشىلىكتى ءوز موينىنا العاندا مۇنداي داۋ تۋماس ەدى"، دەپ ءسوزىن اياقتادى جارقىن كۋرەنتايەۆ.
پىكىر قالدىرۋ