Tax justice network ۇيىمىنىڭ مالىمەتىنشە، سوڭعى 25 جىلدا قازاقستاننان  140–160 ملرد دوللار شەتەلگە زاڭسىز شىعارىلعان. كەي ساراپشىلاردىڭ بولجاۋىنشا، اقشا كولەمى بۇدان دا كوپ.

ال جەمقورلىقپەن كۇرەستى باقىلايتىن Transparency Kazakhstan قورىنىڭ ساراپشىلارى قازاقستانداعى "زاڭسىز شىعارىلعان اكتيۆتەدى قايتارۋ" كوميسسياسىنىڭ جۇمىسىنا كۇدىكپەن قارايتىنىن مالىمدەدى.

مالىمدەمە اۆتورلارى قاڭتار وقيعاسىنان كەيىن توقايەۆ جارلىعىمەن قۇرىلعان "زاڭسىز شىعارىلعان اكتيۆتەردى قايتارۋ" كوميسسياسىنىڭ قوعامعا ەسەپ بەرمەيتىنىنە جانە جۇمىس پروسەسىن اشىق جۇرگىزبەگەنىنە نازار اۋدارعان.

"جەر تەلىمى سياقتى ۇساق مۇلىكتى قايتارۋ –  جەتىستىك  ەمەس، اڭگىمە جالپى ىشكى ونىممەن سالىستىرۋعا كەلەتىن اكتيۆتەر جونىندە بولۋى كەرەك"– دەدى ولار.

Transparency Kazakhstan ساراپشىلارىنىڭ پىكىرىنشە، اكتيۆتەردى قايتارۋ تۋرالى زاڭ جوباسى قۇپيا تالقىلانا بەرسە، وليگارحتار اراسىندا "تيىسۋگە بولمايتىن" ادامدار ءتىزىمى جاسالۋى مۇمكىن.

سونداي–اق، ساراپشىلار بۇل قازاقستاننىڭ جەمقورلىق بويىنشا رەيتينگىسىن ناشارلاتىپ جىبەرۋى مۇمكىن ەكەنىن ايتتى. قازاقستان 2022 جىلعى رەيتينگ بويىنشا جەمقورلىق جايلاعان ەلدەر قاتارىندا تۇر.

ەسكە سالا كەتەيىك، قاڭتار وقيعاسىنان توقايەۆ ەل بايلىعىن بەلگىلى ءبىر توپتار يەلەنىپ العانىن بىرنەشە رەت ايتقان بولاتىن. ال "زاڭسىز شىعارىلعان قارجىنى قايتارۋ جونىندەگى" ارنايى كوميسسيا 2022 جىلى التى ايدا 631 ميلليارد تەڭگە قايتارىلعانىن مالىمدەگەن.

"ەلدەن زاڭسىز شىعارىلعان اكتيۆتەردى قايتارۋ تۋرالى" زاڭ جوباسى 31 ناۋرىزعا دەيىن پارلامەنتكە ەنگىزىلۋى كەرەك ەدى، الايدا ءالى كۇنگە دەيىن ىسكە اسپادى.