استانانىڭ بايقوڭىر اۋداندىق سوتى "تەرروريزمدى ناسيحاتتادى" دەپ ايىپتالعان سۋرەتشى داۋرەن ماكيندى جەتى جىلعا باس بوستاندىعىنان ايىردى.

سۋرەتشى وزىنە تاعىلعان ايىپتى مويىندامايدى. بىلتىر قاڭتار وقيعاسىنان كەيىن سۋرەت، ەسكيزدەر جاريالاعانىن ايتقان سۋرەتشى بار ايىپ "سۋرەت سالۋدى ۇيرەنەمىز" دەپ كەلگەن ارنايى قىزمەتتىڭ ادامدارىمەن بولعان "اڭگىمەگە" نەگىزدەلگەنىن ايتادى.

"ولار ماعان جالا جاۋىپ وتىر. كىناسىز ەكەنىمدى دالەلدەۋگە قانشا تىرىسقانىممەن، ەسكەرگەن جوق. Facebook پاراقشامدا ەلدەگى ساياسي وقيعالارعا قاتىستى پىكىر جاريالادىم. سوعان بايلانىستى سوتتاپ وتىر. ۇكىمگە كەلىسپەيمىن، اپەللياسياعا بەرەمىن" – دەدى داۋرەن ماكين سوتتان كەيىن جۋرناليستتەرگە بەرگەن جاۋابىندا.

بىلتىر سۋرەتشىنىڭ ادۆوكاتى مەن جاقىندارى ماكينگە سۋرەت سالۋدى ۇيرەنەمىز دەگەن سىلتاۋمەن ەكى ادام كەلىپ، ورتاداعى اڭگىمەنى ديكتوفونعا جازىپ العانىن ايتقان ەدى. كەيىن ولاردىڭ ارنايى قىزمەت ادامدارى ەكەنى  انىقتالعان. "بار ايىپ سول اڭگىمەگە نەگىزدەلگەن" دەيدى قورعاۋشىلار تارابى. 

ۇلتتىق قاۋىپسىزدىك كوميتەتى سۋرەتشى ماكيننىڭ تۇتقىندالۋىنا قاتىستى جاۋاپ بەرۋدەن باس تارتقان.

ەسكە سالا كەتەيىك،  داۋرەن ماكيننىڭ "ناۋرىز"، "ماستەر" كارتينالارى استاناداعى تاريحي مۋزەيگە قويىلعان. ونى ارىپتەستەرى ۇلتتىق، تاريحي تاقىرىپتارعا كوپ كارتينا سالعان سۋرەتشى رەتىندە سيپاتتايدى.