الماتى قالاسى ءماسليحاتىنىڭ VIII شاقىرىلىمىندا امانات پارتياسىنىڭ اتىنان سايلانعان دەپۋتات اننا باشينسكايا ۋكراينا پرەزيدەنتى ۆلاديمير زەلەنسييگە قىرىمنىڭ ورنىنا تۇركياعا شابۋىل جاساۋدى ۇسىنعان بولاتىن. كەيىن ول پاراقشاسىندا ءوز پىكىرى ءۇشىن كەشىرىم سۇرادى.
دەپۋتات زەلەنسكييدىڭ اننەكسيالاعان قىرىمدى ۋكرايناعا قايتارۋ جوسپارى جايلى جازعان جازباسىنىڭ استىنا "ودان دا تۇركياعا شابۋىل جاساڭىز، زەلەنسكيي مىرزا! ول جاق قاشاندا جىلى" – دەپ پىكىر قالدىرعان.
كەيىن دەپۋتات بۇل پىكىرى ءۇشىن الەۋمەتتىك پاراقشاسىندا كەشىرىم سۇرادى.
"مەن ۋكراينا پرەزيدەنتىنىڭ مالىمدەمەسىنە ويلانباستان پىكىر جازدىم. تۇركيا تۋرالى بۇلاي ايتقىم كەلگەن جوق. باۋىرلاس تۇرىك حالقىنان كەشىرىم سۇرايمىن. بۇل جاعدايعا تۇسىنىكتەمە بەرۋگە قۇقىم جوق ەدى. ءبىزدىڭ ءوز ەلىمىز بار، مەن دەپۋتات رەتىندە ەڭ الدىمەن ءوز ەلىمنىڭ اماندىعىن ويلاۋىم كەرەك" – دەپ جازدى باشينسكايا.
ەسكە سالا كەتەيىك، دەپۋتات اننا باشينسكايانىڭ قۇنى 6 ميلليارد تەڭگەدەن اساتىن جۇزگە جۋىق مەملەكەتتىك كەلىسىمشارتى بار.
پىكىر قالدىرۋ