2023 جىلى 27 ساۋىردە استانادا مەملەكەت باسشىسىنىڭ توراعالىعىمەن «ادىلەتتى قازاقستان: بىرلىك، تۇراقتىلىق، دامۋ» كۇن تارتىبىمەن قازاقستان حالقى اسسامبلەياسىنىڭ XXXII سەسسياسىنىڭ پلەنارلىق وتىرىسى ءوتتى.

قازاقستان رەسپۋبليكاسىنىڭ پرەزيدەنتى – قازاقستان حالقى اسسامبلەياسىنىڭ ءتوراعاسى ق.توقايەۆقا قحا جۇمىسى بويىنشا ەسەپ بەرىلدى.

مەملەكەت باسشىسى حالىق بىرلىگىن نىعايتۋ، ەتنوسارالىق قاتىناستاردى ۇيلەستىرۋ جونىندەگى مەملەكەتتىك ساياساتتىڭ نەگىزگى اسپەكتىلەرىنە توقتالدى.

پرەزيدەنت ساياسي قۇرىلىمنىڭ جاڭا مودەلى اياسىندا ەتنوسارالىق قاتىناستار جاڭا باعىتتا قالىپتاسىپ جاتقانىن اتاپ ءوتتى. تاۋەلسىزدىك جىلدارىندا بىزدە جاڭا جالپىۇلتتىق بىرەگەيلىك قالىپتاستى، ونىڭ باستى رامىزدەرى — ءبىزدىڭ ءتولقۇجاتىمىز جانە كوك بايراعىمىز، — دەدى ق.توقايەۆ.

سونىمەن قاتار، قازاقستان حالقى اسسامبلەياسىنىڭ ءتوراعاسى قحا مەن مەملەكەتتىك ورگانداردىڭ قۇرىلىمدارى ءۇشىن نەگىزگى جۇيەلى ۇستانىمدارعا توقتالدى. بىرلىگىمىز بەن كەلىسىمىمىزدى بۇزۋعا باعىتتالعان كەز-كەلگەن ارانداتۋشىلىقتى ۇزىلدى-كەسىلدى توقتاتۋ قاجەتتىگى تۋرالى ايتتى. سونداي-اق، ۋاكىلەتتى ورگاندارعا زاڭ شەڭبەرىندە ەتنوسارالىق، تىلدىك جانە الەۋمەتتىك نەگىزدەگى بارلىق ارانداتۋشىلىقتاردىڭ جولىن كەسۋدى تاپسىردى. ويتكەنى، دوستىق پەن كەلىسىم، سىندارلى ديالوگ پەن جاسامپاز ءوزارا ءىس-قيمىل اتموسفەراسى جاساندى كاتەگوريالار ەمەس، ءبىزدىڭ تاريحىمىز، بۇگىنىمىز بەن بولاشاعىمىز!

پرەزيدەنت ءوز سوزىندە اسسامبلەيا مەن ونىڭ مۇشەلەرىنىڭ بەيبىتشىلىك پەن كەلىسىم يدەياسىن، حالقىمىزدىڭ بىرلىگىن، ەلدە كەمسىتۋشىلىكتىڭ جوقتىعىن جانە ءبىزدىڭ بىرلىگىمىزدى سىرتقى اقپاراتتىق ارانداتۋلاردان قورعاۋدى بەلسەندى ىلگەرىلەتۋ جونىندەگى ءىس-قيمىلداردى اتاپ ءوتتى.

پرەزيدەنت ەتنوالەۋمەتتىك شيەلەنىستىڭ سەبەپتەرىن جويۋ جانە ەتنوسارالىق كوممۋنيكاسيانىڭ زاماناۋي ديالوگ الاڭدارىن ۇيىمداستىرۋ ءۇشىن پارمەندى شارالار قابىلداۋ قاجەتتىگىنە نازار اۋداردى.

مەملەكەت باسشىسى "ءبىز ءارالۋانبىز، ءبىراق ءبىز تەڭبىز"، "بىرلىك ءارالۋاندىقتا" قاعيداتتارى بۇكىل ءبىلىم بەرۋ جۇيەسى ارقىلى تارقاتىلۋ كەرەك، ال ەتنومادەني ءارالۋاندىق بارلىق وتاندىق كوركەم شىعارمالاردا نورماعا اينالۋى كەرەك ەكەنىن ەرەكشە اتاپ ءوتتى.

ساياساتىمىزدىڭ ستراتەگيالىق باعىتى رەتىندە كوپمادەنيەتتى ورتانى قالىپتاستىرۋ جانە بارلىق ازاماتتاردىڭ مەملەكەتتىك ءتىلدى مەڭگەرۋ ماسەلەلەرىنە ەرەكشە نازار اۋدارىلدى، ويتكەنى قازاق ءتىلى ازاماتتىق بىرەگەيلىكتىڭ پارمەندى قۇرالى بولىپ تابىلادى.

پرەزيدەنت بۇل ماسەلەگە تياناقتى تالداۋ جاساپ، ساراپتامالىق-بايانداما دايىنداۋدى تاپسىردى.

ءسوز سوڭىندا پرەزيدەنت قحا ازاماتتىق قوعامنىڭ ەتنوسارالىق قاتىناستارى سالاسىندا جەرگىلىكتى ءوزىن-وزى باسقارۋ ينستيتۋتىن دامىتىپ جاتقانىن جانە اسسامبلەيانىڭ بارلىق نەگىزگى جۇمىسى جەرگىلىكتى جەرلەردە جۇرگىزىلۋى ءتيىس ەكەنىن، وبلىس اكىمدەرىنە ءتيىستى نۇسقاۋلار بەرىلگەنىن اتاپ ءوتتى.

اسسامبلەيا مۇشەلەرىنە سويلەگەن سوزىندە پرەزيدەنت ولاردىڭ قوعامدىق بىرلەستىكتىڭ ءبىر بولىگى عانا ەمەس، بەيبىتشىلىك پەن كەلىسىم يدەياسىن ناسيحاتتاۋشىسى ەكەنىن اتاپ ءوتتى.

قازاقستان – ءبىرتۇتاس ۇلت، ەلىمىزدىڭ ءاربىر ەتنوسى دوستىقتى، ۇيلەسىم پەن كەلىسىمدى نىعايتۋعا ءوزىنىڭ ولشەۋسىز ۇلەسىن قوسىپ وتىرعان كوماندا دەپ ايتۋعا بولادى.

پلەنارلىق وتىرىسقا پارلامەنت دەپۋتاتتارى، ورتالىق جانە جەرگىلىكتى اتقارۋشى ورگانداردىڭ، ديپلوماتتىق كورپۋسىنىڭ وكىلدەرى، قحا مۇشەلەرى، رەسپۋبليكالىق جانە وبلىستىق ەتنومادەني بىرلەستىكتەردىڭ ءتوراعالارى، ساياسي پارتيالاردىڭ، ءدىني بىرلەستىكتەردىڭ كوسباسشىلارى، ۇكىمەتتىك ەمەس ۇيىمداردىڭ، عىلىمي، شىعارماشىلىق زيالى قاۋىمىنىڭ، قازاقستاندىق جانە شەتەلدىك بۇقارالىق اقپارات قۇرالدارىنىڭ وكىلدەرى ت.ب 1200 استام ادام قاتىستى.