قازىرگى ۋاقىتتا ءدىني ەكسترەميزم مەن تەرروريزمگە قارسى كۇرەس ماسەلەلەرىنە ەرەكشە كوڭىل بولىنۋدە. بۇل تاقىرىپ وزەكتىلىگىن جوعالتپايدى، ويتكەنى قازىرگى الەمدە ادامزات ءۇشىن كۇردەلى پروبلەماعا اينالعان تەرروريزم مەن ەكسترەميزم سياقتى قۇبىلىستاردىڭ كوبەيۋى بايقالادى. وسى فاكتوردى ەسكەرە وتىرىپ الماتى قالاسى ءدىن ىستەرى جونىندەگى باسقارماسىنىڭ قولداۋىمەن «ادام جانە قوعام» ۇكىمەتتىك ەمەس ۇيىمىنىڭ ۇيىمداستىرۋىمەن ءدىني ەكسترەميزم مەن تەرروريزمنىڭ الدىن الۋ بويىنشا 16-17 مامىر كۇندەرى ارالىعىندا، بىلىكتى تەولوگتاردى، ءدىنتانۋشىلاردى، ساراپشىلاردى، پسيحولوگتار مەن فيلوسوفتاردى تارتا وتىرىپ، الماتى قالاسىنىڭ 100-گە جۋىق جالپى ءبىلىم بەرۋ مەكەمەلەرى مەن كوللەدجدەردىڭ مۇعالىمدەرىنە ارنالعان 12 ساعاتتىق وقىتۋ سەمينارى وتكىزىلدى.

سەمينار بارىسىندا ماماندار تاراپىنان دەسترۋكتيۆتى ءدىني اعىم يدەولوگياسىنىڭ قوعامعا قاۋىپتىلىگى جانە وعان قارسى قولدانىلاتىن دالەلدەر مەن ادىس-تاسىلدەر، زايىرلىلىق تۇسىنىگى، عالامتور كەڭىستىگىندە كۇماندى ءدىني اقپاراتتاردىڭ تارالۋىن بولدىرماۋ جانە وعان قارسى ءتيىمدى ناسيحاتتىق جۇمىستاردى جۇرگىزۋ ادىستەرى جانە ت.ب. ءدىن سالاسىنا قاتىستى ماڭىزدى اقپاراتتار بەرىلدى.

«بۇگىنگى كۇنى ءدىن سالاسىنداعى مەملەكەتتىك ساياساتتىڭ نەگىزگى باعىتتارىنىڭ ءبىرى ءدىني ەكسترەميزم يدەولوگياسىنىڭ تارالۋىنىڭ الدىن-الۋ، ءداستۇرلى ەمەس ءدىني يدەولوگيانىڭ تارالۋىنا قارسى ناسيحات جۇمىستارىن جۇرگىزۋ بولىپ تابىلادى. ءدىني ەكسترەميزم يدەولوگياسىنىڭ تارالۋىمەن كۇرەس بارلىعىمىزدىڭ ورتاق جۇمىسىمىز بولعاندىقتان، جالپى ءبىلىم بەرۋ مەكەمەلەرى مەن كوللەدجدەردىڭ مۇعالىمدەرى  وسى سەميناردان وراسان تاجىريبە الىپ، جۇمىستارىندا ءتيىمدى پايدالانادى دەگەن ويدامىز»، - دەدى ءدىن ىستەرى جونىندەگى باسقارماسى باسشىسىنىڭ ورىنباسارى ەرعالي كوشەكە.   

ماماندار قاتىسۋشىلارمەن قاجەتتى اقپاراتتارىمەن ءبولىسىپ، ءدىنارالىق تولەرانتتىلىق قۇندىلىقتارىن بەكىتۋ جانە ەكسترەميزمنىڭ الدىن الۋ اسا ماڭىزدى ماسەلە ەكەندىگىن جەتكىزدى.

«قاتىسۋشىلارعا دەسترۋكتيۆتى ءدىني اعىمداردىڭ ەرەكشەلىكتەرى، ەكسترەميستىك جانە تەرروريستىك ۇيىمدارعا تارتۋدىڭ پسيحولوگيالىق ادىستەرى تۋرالى ايتىلدى. سونداي-اق، قوعامدىق قاۋىپسىزدىكتى ساقتاۋ جانە مەملەكەتتىڭ وركەندەۋى ءۇشىن كونفەسسياارالىق كەلىسىمنىڭ ماڭىزدىلىعى جايلى اتاپ ءوتىلدى»، - دەدى وقىتۋ سەمينارىنىڭ لەكتورى «نۇر-مۇباراك» ەگيپەت يسلام مادەنيەتى ۋنيۆەرسيتەتى، ءدىني ەكسترەميزمگە قارسى ءىس-قيمىل ورتالىعىنىڭ ديرەكتورى- تيمۋر ءنۇسىپحان ۇلى

وقۋ سەمينارىنىڭ قورىتىندىسى بويىنشا قاتىسۋشىلار ارنايى سەرتيفيكاتتارمەن ماراپاتتالدى.