اباي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ "سەمەي ورمانى" تابيعي رەزەرۆاتىنىڭ باسشىلىعىنا قاتىستى ۇكىمىن جاريالادى.
"مەملەكەتتىك مەكەمەنىڭ ءۇش باسشىسى ۇيىمداسقان قىلمىستىق توپ قۇرىپ، كاسىپكەرلەردەن جۇيەلى تۇردە 700 مىڭنان 13 ميلليون تەڭگەگە دەيىنگى سومادا پارا العان. ولار رەزەرۆات اۋماعىندا سانيتارلىق تازالاۋ مەن اعاش كەسۋگە رۇقسات بەرگەنى، مەملەكەتتىك ساتىپ الۋ جونىندەگى شارتتارعا كەدەرگىسىز قول قويعانى ءۇشىن پارا العان" – دەلىنگەن حابارلامادا.
رەزەرۆاتتىڭ ءۇش باسشىسى دا ون جىلعا سوتتالدى. ال پارا بەرۋشى بەس ادام كىنالى دەپ تانىلىپ، ءبىر جارىم جىلدان ءۇش جارىم جىلعا دەيىن باس بوستاندىعىنان ايىرىلدى.
بارلىق سوتتالعان ادامدار مەملەكەتتىك قىزمەتتە، جەرگىلىكتى ءوزىن – ءوزى باسقارۋ ورگاندارىندا، قارجى ۇيىمدارىندا جانە كۆازيمەملەكەتتىك سەكتوردا قىزمەت اتقارۋ قۇقىعىنان ءومىر بويىنا ايىرىلادى.
ۇكىم زاڭدى كۇشىنە ەنگەن جوق.
پىكىر قالدىرۋ