بيزنەستى اشۋ جانە ونى جۇرگىزۋ راسىمدەرى جەڭىلدەتىلدى. ازيا جانە تىنىق مۇحيتى ايماعىن دامىتۋ ينستيتۋتتارى قاۋىمداستىعىنىڭ (ADFIAP) 46-شى جىل سايىنعى جينالىسى. 

- «ورتالىق ازيانىڭ ينۆەستيسيالىق تارتىمدىلىعى» اتتى سەسسياسىندا ق ر ۇەم ينۆەستيسيالىق ساياسات دەپارتامەنتىنىڭ ديرەكتورى ءاليا ەسداۋلەتوۆا قازاقستانداعى ينۆەستيسيالىق بەلسەندىلىكتى ىنتالاندىرۋ تەتىكتەرى تۋرالى ايتىپ بەردى، دەپ حابارلايدى Almaty-akshamy.kz.
 
ەلىمىزدىڭ ينۆەستيسيالىق تارتىمدىلىعىن ارتتىرۋ ءۇشىن نە جاسالدى:   

– قر-دا ينفراقۇرىلىمدى جانە ينۆەستيسيالىق پرەفەرەنسيالاردىڭ كەڭ سپەكترىن ۇسىناتىن 14 ارنايى ەكونوميكالىق جانە 33 يندۋستريالىق ايماق جۇمىس ىستەيدى

– بيزنەستى اشۋ جانە ونى جۇرگىزۋ راسىمدەرى جەڭىلدەتىلدى  

–  باسىم سەكتورلاردا جۇمىس ىستەيتىن كومپانيالار سالىقتار مەن كەدەندىك باجداردان بوساتىلىپ، زاتتاي گرانت، ينۆەستيسيالىق نەسيە، جۇمىسقا جەڭىلدەتىلگەن رۇقسات الادى

– ينۆەستورلار جوبالاردى ىسكە اسىرۋ كەزىندە ۇكىمەتپەن ينۆەستيسيالىق كەلىسىمدەرگە قول قويىپ، قولدانىستاعى زاڭنامالىق شارتتاردىڭ وزگەرمەيتىندىگىنە كەپىلدىك الادى. بۇل تەتىك ءىرى جوبالارعا جەكە قاراجات تارتۋعا باعىتتالعان  

بۇگىنگى تاڭدا تۇراقتى نورماتيۆتىك قۇقىقتىق بازا جانە ينۆەستيسيالىق قىزمەت ءۇشىن قولايلى جاعداي جاسالعان. بۇل وتكەن جىلى بۇرىن-سوڭدى بولماعان تىكەلەي شەتەلدىك ينۆەستيسيالاردى تارتۋعا ىقپال ەتتى - $28 ملرد. بۇل سوڭعى 10 جىلداعى ەڭ جوعارى كورسەتكىش.   

«سونداي-اق زاڭنامادا تاۋار ءوندىرۋشى كاسىپورىندارعا سالىق زاڭناماسىنىڭ 10 جىلعا تۇراقتىلىعىنا كەپىلدىك بەرەتىن ينۆەستيسيالىق مىندەتتەمەلەر تۋرالى كەلىسىم جاساسۋ مۇمكىندىگى كوزدەلگەن. ءوز كەزەگىندە، ينۆەستور ءوندىرىستى ىسكە قوسۋعا نەمەسە جاڭعىرتۋعا قاراجات سالۋعا (كەمىندە $500 ملن)، قازاقستاندىق كادرلاردى وقىتۋعا مىندەتتەلەدى»، - دەپ ناقتىلادى ءا.ەسداۋلەتوۆا.

ءمجا (مەملەكەتتىك-جەكەمەنشىك ارىپتەستىك) تەتىكتەرىن قايتا جۇكتەۋ ءۇشىن ءتيىستى زاڭعا تۇزەتۋلەر ەنگىزىلدى. ەندى بارلىق جوبالار كونكۋرستىق راسىمدەردەن وتەدى. بۇل ولاردىڭ ساپاسىن ارتتىرادى. 

جالپى، ينۆەستيسيالىق احۋالدى ودان ءارى جاقسارتۋ ءۇشىن ق ر ينۆەستيسيالىق ساياساتىنىڭ جاڭا تۇجىرىمداماسى بەكىتىلدى، 76 ەلمەن ۆيزاسىز رەجيم ورناتىلعان. ينۆەستيسيالىق ومبۋدسمەن ينستيتۋتى جۇمىس ىستەيدى. بيزنەستى جاۋاپتى جۇرگىزۋ ستاندارتتارىن جانە ەىدۇ-نىڭ (ەكونوميكالىق ىنتىماقتاستىق جانە دامۋ ۇيىمى) باسشىلىق قاعيداتتارىن ىلگەرىلەتۋ ءۇشىن قازاقستاندا ق ر ۇەم جانىنان ۇلتتىق بايلانىس ورتالىعى قۇرىلدى.