وڭدەۋ جۇمىستارى تاڭعى ۋاقىتتا جۇرگىزىلەدى. الماتىدا 15 مامىردان باستاپ اۋدانى 2424،54 گا بولاتىن ورماندى القاپتاردا، قالا ساياباقتارى مەن سكۆەرلەرىندە كەنەلەرگە قارسى دەزينسەكسيالىق وڭدەۋ جۇمىستارىنىڭ ەكىنشى كەزەڭى باستالادى. بۇل تۋرالى الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى ايتتى.

سپيكەردىڭ سوزىنشە، الماتىدا 15 مامىر - 5 ماۋسىم ارالىعىندا كەنەگە قارسى دەزينسەكسيالىق وڭدەۋ جۇمىستارىنىڭ ەكىنشى كەزەڭى وتەدى.

«وڭدەۋ جۇمىستارىمەن 8 ورماندى القاپ (كولەمى – 1904،924 گا)، 144 قالا ساياباقتارى مەن سكۆەرلەرى (كولەمى – 519،616 گا) قامتىلادى جانە اۋا-رايىنا بايلانىستى، ياعني، قۇرعاق، جاۋىن-شاشىنسىز كۇندەرى كەستەگە سايكەس 15 مامىردان 5 ماۋسىمعا دەيىن جۇرگىزىلەدى. دەزينسەكسيالىق ءىس-شارانى قالالىق سانيتاريالىق-ەپيدەميولوگيالىق باقىلاۋ قىزمەتىنىڭ ماماندارىنىڭ باقىلاۋىمەن «الماتى قالاسىنىڭ دەزينفەكسيا ورتالىعى» فيليالى جۇرگىزەدى»، - دەدى قاسىمحان الپىسباي ۇلى.

جاساقتالعان دەزبريگادالار قاجەتتى قۇرالدارمەن، كولىكتەرمەن جانە جەكە باس قورعانىش زاتتارىمەن جابدىقتالعان. وڭدەۋ جۇمىستارىن جۇرگىزۋ ءۇشىن «فاۆوريت» اكاريسيدتىك پرەپاراتى قولدانىلادى. پرەپارات از ۋىتتى جانە قاۋىپتىلىگى تومەن ساناتقا جاتقىزىلادى (3-4 كلاسس).

كەنەلەرمەن كۇرەسۋ ءۇشىن قولدانىلاتىن دوزالار ەڭ از جانە ادامدار مەن جانۋارلار ءۇشىن ءقاۋىپسىز بولىپ تابىلادى.

«وڭدەۋ جۇمىستارى تاڭعى ساعاتتاردا جۇرگىزىلەدى. وڭدەلەتىن اۋماقتاردىڭ شەكارالارىندا «كەنەگە قارسى وڭدەۋ جۇرگىزىلۋدە» ەسكەرتۋ حابارلامالارى بار تاقتالار ورناتالادى»، - دەدى الماتى قالاسىنىڭ سەبد باسشىسى.

ەسكە سالايىق، الماتىدا 29 ناۋرىز – 28 ءساۋىر ارالىعىندا كەنەلەرگە قارسى وندەۋ جۇمىستارىنىڭ ءبىرىنشى كەزەڭى وتكەن بولاتىن.