رەسەيدىڭ 23 قالاسىندا وپپوزيسياداعى ساياساتكەر الەكسەي ناۆالنىيعا قولداۋ بىلدىرگەن اكسيا ءوتىپ، 100–دەن استام ادام قاماۋعا الىنعان. ۇستالعانداردىڭ تورتتەن ءبىرى – كامەلەتكە تولماعاندار، دەپ مالىمدەدى "وۆد-ينفو" قۇقىق قورعاۋ ۇيىمى. 

ماسكەۋدە اكسياعا شىققان 60 تان استام ادام، ال سانكت–پەتەربۋرگتە 10 نان استام ادام ۇستالعان. قالعان 30 عا جۋىق ادام رەسەيدىڭ وزگە 21 قالاسىنان قاماۋعا الىنعان، دەپ حابارلادى ازاتتىق راديوسى.

رەسەيدىڭ ۆلاديمير قالاسىندا قاتاڭ رەجيمدەگى كولونيادا قاماۋدا وتىرعان وپپوزيسيونەر الەكسەي ناۆالنىي 4 ماۋسىمدا 47 جاسقا تولعان بولتانى. اكسيا وتكىزۋگە رەسەي بيلىگىمەن كەلىسىم بەرمەگەن. الايدا بەلسەندىلەر جالعىز ادامدىق پيكەتكە شىعىپ، ۇگىت قاعازدارىن جاپسىرىپ، تاراتقان. وسىلايشا ناۆالنىيدى قولدايتىنىن ءتۇرلى جولدارمەن بىلدىرگەن.

"ناۆالنىي كومانداسىنىڭ" مالىمدەۋىنشە، مۇنداي اكسيا رەسەيدەن بولەك اۆستراليانىڭ سيدنەي، مەلبۋرن، بريسبەن قالالارىندا، جاپونيا استاناسى توكيودا، وڭتۇستىك كورەيادا، تايلاندتا جانە ەۋروپانىڭ ونداعان قالاسىندا بولعان.