الماتىدا پوليسەيلەر قالتالى ازاماتتارعا ەسكورت قىزمەتىن ۇسىنۋمەن اينالىسقان 25 جاستاعى بويجەتكەندى ۇستادى. ول اقشاعا سەكسۋالدى قىزمەت كورسەتۋگە دايىن كەلبەتتى قىزداردى ىزدەپ، باي كليەنتتەر تارتۋمەن اينالىسقان. 

كۇدىكتى قىزدارعا "دەمەۋشىلەر" تابۋعا، الەمدى ارالاتىپ، ءومىرىن جەڭىلدەتۋگە ۋادە بەرگەن. ال توپقا كىرۋ ءۇشىن 300 دوللار تولەۋ كەرەك بولعان. كورسەتىلگەن جەڭگەتايلىق قىزمەتى ءۇشىن كۇدىكتى كليەنتتەن تۇسكەن اقشانىڭ 40 پايىزىن وزىنە الىپ وتىرعان. اقشانىڭ قالعان بولىگى قىزمەت كورسەتكەن قىز العان.

كەزدەسۋ قۇنى 1 ساعات ءۇشىن 500 مىڭ تەڭگەدەن باستاپ، ءارتۇرلى باعامەن ولشەنگەن. قارجى مونيتورينگى اگەنتتىگى تەرگەۋ ناتيجەسىندە كۇدىكتىنىڭ 2022 جىلعى قاراجات اينالىمى 209 ميلليون تەڭگەدەن اسقانىن انىقتادى.

"مۇنداي بيزنەستى ۇيىمداستىرۋشى ءوز قىزمەتىن جاسىرۋعا تىرىسىپ، Instagram جەلىسىندە ءوزىن 100 مىڭنان استام وقىرمانى بار تابىستى مودەل رەتىندە كورسەتكەن. رەسمي تۇردە ەش جەردە جۇمىس ىستەمەگەن. ءتىنتۋ بارىسىندا كۇدىكتىدەن كاسىبى تۋرالى جازبالارى بار كۇندەلىك، جىلجىمايتىن مۇلىك ساتىپ الۋ تۋرالى قۇجاتتار، اق ءتۇستى ۇنتاق قالدىقتارى بار قالتا ايناسى، ەسىرتكى زاتتارىن تۇتىنۋ ءۇشىن ورالعان اقشا، Lexus ES 250 جانە Toyota Camry 70 ماركالى اۆتوماشينالار، سالماعى 1،72 گرامم "مەفەدرون" تابىلىپ، تاركىلەندى"، – دەلىنگەن حابارلامادا.

پروكۋراتۋرا كەلىسىمى بويىنشا قىلمىستىق كودەكستىڭ 309 بابى "جەزوكشەلىكپەن اينالىسۋعا پريتوندار ۇيىمداستىرۋ جانە جەڭگەتايلىق" جانە 297 بابى "ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ" بويىنشا سوتقا دەيىنگى ءىس قوزعالدى.