قىرىمعا لاگەرگە اتتانعان وقۋشىلار امان–ەسەن ەلگە ورالىپ، اتا–اناسىنا تابىستالعان. بۇل تۋرالى وقۋ–اعارتۋ ءمينيسترى عاني بەيسەمبايەۆ مالىمدەدى.

"ءمۇعالىم ءتيىستى جازاعا تارتىلدى. بۇل ءىس-شارا اتا–انالاردىڭ كەلىسىمىمەن وتكىزىلدى. بۇدان ءارى بولاشاقتا بۇعان جول بەرمەۋ ءۇشىن مينيسترلىكتىڭ بۇيرىعىنسىز جانە بالالاردىڭ قۇقىقتارىن قورعاۋ كوميتەتىنىڭ رۇقساتىنسىز وقۋشىلاردىڭ شەتەلگە شىعۋىنا تىيىم سالۋ بويىنشا جۇمىس جۇرگىزەمىز"، – دەدى ول.

ەسكە سالا كەتەيىك، بۇعان دەيىن قازاقستاندىق مەكتەپ وقۋشىلارى قىرىمنىڭ وڭتۇستىك جاعالاۋىنداعى "ارتەك" لاگەرىنە 24 كۇنگە دەمالىسقا جىبەرىلگەن. بۇل اقپاراتتى استانا قالاسىنداعى "ورىس ءۇيى" جاريالاعان بولاتىن. 

الەۋمەتتىك جەلىدە بۇل وقيعا قىزۋ تالقىعا ءتۇسىپ، مينيسترلىكتەن تۇسىنىكتەمە تالاپ ەتكەندەر كوپ بولدى. وقۋ–اعارتۋ مينيسترلىگى بالالاردىڭ قۇقىعىن قورعاۋ كوميتەتىنىڭ ءتورايىمى ناسىمجان وسپانوۆا اتا–انالار ءبىلىم بەرۋ ۇيىمدارىنا حابار بەرمەي، اتالعان ايماققا بالالارىمەن كەتىپ قالعانىن ايتتى.

ال عاني بەيسەمبايەۆ قىرىمعا بالالاردى جىبەرگەن مەكتەپتەرگە وبلىستىق ءبىلىم باسقارماسى تاراپىنان قاتاڭ ەسكەرتۋلەر بەرىلگەنىن مالىمدەگەن بولاتىن.