استاناداعى Kaspi فيليالىندا ادامداردى كەپىلگە العان ەر ادامنىڭ دەنەسى مەن قولىنا جارىلعىش زات بولعان. بۇل تۋرالى "قازينفورم" باسىلىمىنا بەرگەن سۇحباتىندا ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ايتتى. ول شابۋىل جاساۋشى نەمەن قارۋلانعان دەگەن سۇراققا جاۋاپ بەردى.

"ونىڭ تاپانشاعا ۇقسايتىن زاتى بولدى. ونىڭ ۇستىنە دەنەسى مەن قولىنا قولدان جاسالعان جارىلعىشقا ۇقساس زات بەكىتىلگەن. ءقازىر بۇل زاتتار ساراپتاماعا جىبەرىلدى. ولاردىڭ قانشالىقتى بەلسەندى جارىلعىش قۇرىلعى نەمەسە ءپىشىن ەكەنىن – ساراپتاما انىقتايدى"، - دەدى مارات قوجايەۆ.

سونداي-اق، ءىىم باسشىسىنىڭ ءبىرىنشى ورىنباسارى كەپىلگە الىنعانداردى بوساتۋ جونىندەگى ارنايى وپەراسيانىڭ باسقا دا جاي-جاپسارىن ايتىپ بەردى.

"ادامدى نەعۇرلىم تەزىرەك انىقتاساق، ونىمەن كەلىسسوز جۇرگىزۋ وڭايىراق. بۇل جاعدايدا ونىڭ تۋىستارىن قوستىق. ءبىز ونى سۋرەتكە ءتۇسىرىپ، دەرەكقورلارىمىزدى قاراپ، ادامنىڭ جەكە باسىن انىقتادىق. ول باستاپقىدا ءوزىن مۇلدەم باسقا ەسىممەن تانىستىردى. ءبىز ديلشوت دەگەن اداممەن كەلىسسوز جۇرگىزىپ جاتقان ەدىك"، - دەيدى مارات قوجايەۆ.

كەيىن، ونىڭ ايتۋىنشا، كۇدىكتى كىم ەكەنى سۋرەتتەن انىقتالعان. بۇل جامبىل وبلىسى، گرودەكوۆو اۋىلىنىڭ تۋماسى ءاليحان مۋرادوۆ بولىپ شىقتى.

"جامبىل وبلىسىنا شىقتىق، وندا ءبىزدىڭ بولىمشەلەرىمىز كۇدىكتىنىڭ تۋىستارىن تەز تاۋىپ الدى، ولار ارقىلى وعان اسەر ەتۋگە تىرىستىق، سول ارقىلى كۇدىكتى جاساۋى ىقتيمال ارەكەتتەردى بارىنشا ازايتتى. بەيبىت جولمەن شەشۋگە تىرىستىق، سوڭعى شارا رەتىندە كەلىسسوز كۇشى بولماسا، ارنايى بولىمشەلەر قوسىلۋى كەرەك ەدى"، - دەدى ىشكى ىستەر ءمينيسترىنىڭ ءبىرىنشى ورىنباسارى.