جۇما كۇنى كەشكە پريگوجيننىڭ تەلەگرام-ارناسىندا "ەلدىڭ اسكەري باسشىلىعىنا قارسى" بۇلىك باستاپ، "ادىلدىك ورناتاتىنىن" مالىمدەدى. ول جۇرتتى "قارسىلىق بىلدىرمەي بەرىلۋگە" شاقىردى جانە قاراماعىندا 25 مىڭ سارباز بار ەكەنىن ەسكەرتتى.
رەسەي فەدەرالدىق قاۋىپسىزدىك قىزمەتى قارۋلى بۇلىككە شاقىرعانى ءۇشىن "ۆاگنەر" جەكەمەنشىك اسكەري كومپانياسىنىڭ جەتەكشىسى ەۆگەنيي پريگوجيننىڭ ۇستىنەن قىلمىستىق ءىس قوزعاعانىن حابارلادى. بۇل جونىندە رەسەي باس پروكۋراتۋراسى حابارلادى.
جۇما كۇنى ەۆگەنيي پريگوجين "ۆاگنەر" جاۋىنگەرلەرىن ارتيللەريا مەن اسكەري تىكۇشاق كومەگىمەن اتقىلاپ جاتىر دەپ رەسەي قورعانىس مينيسترلىگىن ايىپتاعان. ونىڭ ايتۋىنشا، وسىنىڭ كەسىرىنەن ونىڭ اسكەريلەرى قازا تاپقان.
ءبىراق ەلدىڭ ساياسي باسشىلىعىن باسىپ الۋ ويى جوق ەكەنىن، "پرەزيدەنت بيلىگى، ىشكى ىستەر مينيسترلىگى، ۇكىمەت جانە باسقا دا قۇرىلىمدار بۇرىنعى قالىپپەن جۇمىس ىستەي بەرەتىنىن" ايتتى.
ال "ۆاگنەر" باسشىسى سوڭعى مالىمدەمەسىندە روستوۆ قالاسىنا كىرىپ بارا جاتقانىن مالىمدەدى.
پىكىر قالدىرۋ