بۇگىن الماتى گارنيزونىنىڭ اسكەري سوتى قاڭتار وقيعاسىندا وققا ۇشقان وتباسىنىڭ ىسىنە بايلانىستى سوت ۇكىمىن شىعاردى. سوتتا نۇربولات سەيىتقۇلوۆ پەن التىناي ەتايەۆا جانە ولاردىڭ 15 جاستاعى قىزى نۇراي ورازحاننىڭ ولىمىنە قاتارداعى جاۋىنگەر دانيار ەگەمبايەۆ كىنالى دەپ تانىلعان. ول 7 جىلعا باس بوستاندىعىنان ايىرىلدى.
سوتتالۋشى ەگەمبايەۆتىڭ اناسى اياۋجان ەگەمبايەۆا "ۇلىم بۇيرىقتى ورىنداۋشى عانا، ونىڭ قاسىندا 12-13 اسكەري قىزمەتكەر بولعان" دەپ مالىمدەدى.
"جالعىز مەنىڭ ۇلىمدى كىنالى ەتكەنى ادىلەتسىزدىك. ونىڭ قاسىندا تاجىريبەلى اسكەري قىزمەتكەرلەر، وفيسەرلەر، ىشكى ىستەر ورگانىنىڭ ارناۋلى جاساعى بولدى. سولاردىڭ ءبارىن سوتقا اكەلۋ كەرەك ەدى. ۇلىما بۇيرىق بەرگەن كوماندير دە جوق. 12-13 ادامنىڭ ىشىنەن تاجىريبەسى جوق، 21 جاستاعى مەنىڭ ۇلىمدى عانا كىنالى ەتىپ وتىر. بۇيرىق بەرگەن ادامدار جاۋاپقا تارتىلۋعا ءتيىس. سوتتا 57 وق اتىلعانى ايتىلدى. سونىڭ ىشىندە مەنىڭ بالامنىڭ 2 وعى عانا دالەلدەنىپ وتىر. اپەللياسيالىق شاعىم تۇسىرەمىز، ءىستى قايتا تەرگەۋدى تالاپ ەتەمىز" دەگەن سوتتالۋشىنىڭ اناسى ازاتتىق راديوسىنا.
ال مارقۇم سەيىتقۇلوۆتىڭ اپكەسى، جابىرلەنۋشى داريعا داۋىتالييەۆا "سەيىتقۇلوۆتارعا 120 وق اتىلعان" دەپ حابارلادى.
"سوت نۇربولات پەن نۇرايدىڭ باسىنا تيگەن وقتاردى عانا دالەلدەندى دەپ وتىر. ولارعا 120 وق اتىلعان. ءبىراق ءبىر ادام عانا كىنالى بوپ شىقتى. اتقان ادامنىڭ ءبارى جاۋاپقا تارتىلۋعا ءتيىس ەدى" - دەدى داۋىتالييەۆا.
پىكىر قالدىرۋ