الماتىدا اپەللياسيالىق سوت زاڭگەر ايەلدىڭ ولىمىنە قاتىستى ءىس بويىنشا ۇكىم شىعاردى.
الماتى قالالىق سوتىنىڭ اپەللياسيالىق ساتىسىنىڭ شەشىمى بويىنشا تالعات نۇرتايەۆتىڭ ۇكىمى قايتا قارالاتىن بولادى. وسىلايشا، اپەللياسيالىق سوت القاسى نۇرتايەۆتىڭ ۇكىمىن جويىپ، ءىستى سوتتىڭ باسقا قۇرامداعى جاڭا سوت تالقىلاۋىنا جىبەرۋ تۋرالى شەشىم قابىلدادى.
بۇعان دەيىن الماتىلىق تالعات نۇرتايەۆ ءوزىنىڭ بۇرىنعى ايەلى زاڭگەر ايمان اسانوۆانى پىشاقتاپ ولتىرگەن بولاتىن. سوت ونى "اففەكت" جاعدايىندا قىلمىس جاسادى دەپ 1.5 جىلعا سوتتاعان. الەۋمەتتىك جەلىدە سوت ۇكىمى قىزۋ تالقىعا ءتۇسىپ، نارازىلىق بىلدىرگەندەردىڭ سانى ارتتى.
سوت مالىمەتىنشە، القابيلەردىڭ قاتىسۋىمەن ۇكىمنىڭ كۇشىن جويۋعا مىنالار نەگىز بولدى:
- سوت بۇرىن زەرتتەمەگەن دالەلدەمەلەرگە سىلتەمە جاساعان قورعاۋشى تاراپتىڭ ادۆوكاتىنىڭ جارىسسوزىندە سويلەۋ ءتارتىبىنىڭ بۇزىلۋى؛
- القابيلەردىڭ الدىنا بەلگىلى ءبىر زاڭدى تەرميندەردى قولدانا وتىرىپ سۇراقتار قويىلدى، مىسالى: كەنەتتەن پايدا بولعان قاتتى پسيحيكالىق تولقۋ جاعدايىندا كىسى ءولتىرۋ، بۇل زاڭمەن رۇقسات ەتىلمەيدى؛
- ايىپتاۋشى تاراپ ءىس ماتەريالدارىنا قوسا بەرىلمەگەن بەينەجازباسى بار ديسك تۇرىندە جول بەرىلمەيتىن دالەلدەمە ۇسىندى، ديسكىنىڭ شىعۋ تەگى ەشتەڭەمەن راستالمادى، مۇنداي ديسك زاتتاي دالەلدەمەلەر رەتىندە تانىلمادى.
"اپەللياسيالىق ساتىداعى سوت قىلمىستىق جانە پروسەستىك زاڭناما نورمالارىنىڭ ساقتالۋىن تەكسەرەدى جانە وسى نەگىزدە القابيلەردىڭ قاتىسۋىمەن ۇكىمنىڭ زاڭدىلىعىن، دۇرىستىعىن جانە ادىلدىگىن تەكسەرەدى. ءىس جۇرگىزۋ نورمالارىن بۇزۋ ءىستى جاڭا سوت تالقىلاۋىنا جىبەرە وتىرىپ، ۇكىمنىڭ كۇشىن جويۋعا نەگىز بولدى"، - دەپ حابارلادى سوت.
پىكىر قالدىرۋ