مۋفتيات Zam-Zam Qazaqstan كومپانياسىنىڭ ديرەكتورى دانيار يلييەۆتىڭ ۇستىنەن سوتقا شاعىم تۇسىرەدى. 

قازاقستان مۇسىلماندارى ءدىني باسقارماسى ساۋد ارابياسىنا قاجىلىق پارىزىن وتەۋگە بارىپ، ەلگە كەرى قايتا الماي قالعان وتانداستارىمىزعا قاتىستى مالىمدەمە جاسادى.

مۋفتيات Zam-Zam Qazaqstan كومپانياسىنىڭ قاجىلارعا قىزمەت كورسەتۋگە قاتىستى ليسەنزياسى وسى جىلى رەسمي قاجىلىق ورىندارىن العان تۋروپەراتورلار تىزىمىندە جوق ەكەنىن، ولاردىڭ قىزمەتىنە مۇلدە جۇگىنبەۋ كەرەگىن ايتىپ، بىرنەشە رەت دابىل قاققان بولاتىن.

سونىمەن قاتار، وسىعان دەيىن قاجىلاردى الداپ، دالادا قالدىرعان كومپانيانىڭ زاڭسىز ارەكەتتەرى تۋرالى قۇقىق قورعاۋ ورگاندارىنا شاعىم تۇسىرگەن.

"قولدان جاسالعان قاجىلىق ۆيزالارىن پايدالانعان كومپانيا وكىلدەرى شاريعات پەن زاڭعا قايشى ارەكەتتەرىن ءالى كۇنگە جالعاستىرىپ كەلەدى. قازاقستان ازاماتتارىن زاڭسىز جولمەن قاجىلىققا اكەلگەن Zam-Zam Qazaqstan كومپانياسىنىڭ جەتەكشىسى دانيار يلييەۆ زاڭ الدىندا جاۋاپ بەرۋگە ءتيىس دەپ. ولار شاريعات پەن زاڭدى بەلدەن باسۋمەن قاتار، "ءمۇفتيات قاجىلىق كۆوتاسىن ساتادى، پارا الادى" دەپ جالا جابۋىن دوعارماي، ەندى "قمدب جالعان قاجىلىق كۆوتالارىن جاسادى" دەپ اقپارات تاراتىپ جاتىر"  – قمدب باسپا ءسوز حاتشىسى اعابەك قونارباي ۇلى.

ونىڭ ايتۋىنشا، وسى جاعدايعا بايلانىستى ءدىني باسقارماعا ءجابىر كورگەن قاجىلار مەن ونىڭ تۋىستارىنان Zam-Zam Qazaqstan كومپانياسىن قۇقىقتىق جاۋاپكەرشىلىككە تارتۋ بويىنشا ءتيىستى شارا قولدانىلسىن دەگەن شىعىمدار تولاسسىز ءتۇسىپ جاتىر.

قمدب قاجىلىق كونكۋرسىنان وتكەن، قاجىلىق ساپارىن ۇيىمداستىرۋعا قابىلەتتى دەپ تانىلعان، ءمۇفتيات جاريالاعان تىزىمگە ساي تۋروپەراتورلار قىزمەتىنە جۇگىنۋ قاجەتتىگىن ەسكەرتتى. سونىمەن قاتار، "قمدب جالعان قاجىلىق ۆيزالارىن دايىندادى" دەپ جالا جاپقان Zam-Zam Qazaqstan كومپانياسىنىڭ ديرەكتورى دانيار يلييەۆتىڭ ۇستىنەن سوتقا شاعىم تۇسىرەتىنىن حابارلادى.

"ولار اللا الدىنداعى پارىزىن وتەيمىن دەپ كەلگەن قاجىلارعا قيانات جاسادى" – دەلىنگەن حابارلامادا.

ەسكە سالا كەتەيىك، بۇعان دەيىن Zam-Zam Qazaqstan  كومپانياسى قاجىلىققا اتتانعان 380 ادامدى الداپ، جالعان ۆيزا بەردى دەگەن اقپارات تاراعان بولاتىن.