شىعىس قازاقستان وبلىسى مارالدى اۋىلىنىڭ تۇرعىندارى يندۋستريا جانە ينفراقۇرىلىمدىق دامۋ ءمينيسترى مارات قارابايەۆپەن كەزدەسۋ ءۇشىن استاناعا كەلدى.
تۇرعىندار بىرنەشە جىلدان بەرى اۋىل ماڭىندا التىن فابريكاسىنىڭ سالىنۋىنا قارسى كۇرەسىپ كەلەدى. بۇل تۋرالى Ulysmedia.kz پورتالى حابارلادى.
ولار فابريكانىڭ مارالدى وزەنىنىڭ جاقىن ورنالاساتىنىنا نارازى. ءوندىرىس ورنى جەرگىلىكتى حالىقتىڭ دەنساۋلىعىنا زالالىن تيگىزىپ، قىزىل كىتاپقا ەنگەن تابيعي قورىقتى، وسىمدىكتەردى، جانۋارلار مەن قۇستاردى جويىپ جىبەرەدى دەپ قارسى بولىپ وتىر.
اۋىل تۇرعىندارىنىڭ ايتۋىنشا، شاعىمدارىن بارلىق مەكەمەگە جەتكىزگەن. الايدا ەشكىم ونى ەلەمەي، شەنەۋنىكتەر بىر-بىرىنە سىلتەي بەرگەن. بۇگىن ولار ەكى جىلدان بەرى جالعاسىپ كەلە جاتقان داۋدىڭ شەشىمىن تابۋ ءۇشىن، ييدم باسشىسىمەن بەتپە-بەت جۇزدەسۋگە ەلورداعا كەلگەن.
پىكىر قالدىرۋ