«AMANAT» پارتياسىنىڭ حاتشىسى داۋلەت كارىبەك دومبىرا – ۇلتتىق مادەنيەتىمىزدىڭ، رۋحانياتىمىز بەن ونەرىمىزدىڭ التىن قازىناسى ەكەنىن اتاپ ءوتتى.

«قازاق بار جەردە – قاسيەتتى دومبىرا، دومبىرا بار جەردە – ۇلى قازاق حالقى بار. ون توعىز پەرنە، قۋ شاناقتا حالقىمىزدىڭ جانى، مۇڭى، زارى، قۋانىشى مەن جۇبانىشى، تاريحى مەن تانىمى سىيىپ تۇر. ونىڭ ەكى ىشەگىندە ەكى الەمنىڭ اۋەنى، ەكى دۇنيەنى تەربەيتىن قۋات بار. رۋحىمىزدى بيىكتەتەتىن، ايبىنىمىزدى اسقاقتاتاتىن ۇلتتىق اسپابىمىز – قاستەرلى قازىنامىز»، – دەدى د.كارىبەك. 

ءسوز سوڭىندا پارتيا حاتشىسى «التىن دومبىرا» ورتالىعىنىڭ شاكىرتتەرىنە قولداۋ كورسەتىپ، العىس حات پەن قارجى سەرتيفيكاتىن تابىس ەتتى.

«جاستار رۋحى» جاستار قاناتىنىڭ ءتوراعاسى نۇرجان جەتپىسبايەۆ ۇلتتىق دومبىرانى ۇلىقتاۋ ءىس-شارالارى ەلوردامەن شەكتەلمەي، وعان ەل اۋماعىندا باس-اياعى 4 000-عا جۋىق ادام ءۇن قوسىپ جاتقانىن جەتكىزدى.

«ءبىز بابادان ميراس بولىپ قالعان قاستەرلى دومبىرانىڭ ءمانى مەن ماڭىزىن، تاريحىن جاس ۇرپاقتىڭ بويىنا ءسىڭىرۋدى كوزدەپ وتىرمىز. دومبىرا – ۇلتىمىزدىڭ جۇرەك ءۇنى، كوڭىل سىرى. حالىقتىڭ رۋحىن كوتەرىپ، ورتاق وتانىمىزعا دەگەن ماحابباتىن جاڭعىرتساق دەيمىز. ەل مەن جەرگە دەگەن، مادەنيەت پەن داستۇرگە دەگەن سۇيىسپەنشىلىك وسىنداي ءىس-شارالاردا قالىپتاسادى»، – دەدى ول.

استانا قالاسىنىڭ اكىمىنىڭ ورىنباسارى ەسەت بايكەن قارا دومبىرا حالقىمىزدىڭ بولمىسىمەن ەگىز، مىنەزىمەن ۇندەس اسپاپ ەكەنىن العا تارتتى.

«بيىل ەلوردادا 17 مىڭ بالاقاي ءبىرىنشى سىنىپتىڭ تابالدىرىعىن اتتايدى. ونىڭ 9 مىڭنان استامى قازاق سىنىپتارىندا ءبىلىم الۋعا نيەتتى. ولاردىڭ 6 مىڭنان استامى قوسىمشا ساباق رەتىندە دومبىرا ءپانىن تاڭدادى. جاس ۇرپاقتىڭ ۇلتتىق اسپاپقا دەگەن قىزىعۋشىلىعىنىڭ ءبىر كورىنىسى – وسى»، – دەدى ە. بايكەن.

ءىس-شارا بارىسىندا «التىن دومبىرا» ورتالىعىنىڭ شاكىرتتەرى ءبىر ەمەس، بىرنەشە كۇيدى ورىنداپ، كوزىقاراقتى كورەرمەننىڭ ريزاشىلىعىنا بولەندى. سونداي-اق، كورەرمەندەر اراسىندا ۆيكتورينالار ويناتىلىپ، قىزىقتى سۇراقتار قويىلدى.