جىل سايىن «جاسىل ەل» ساربازدارى قاتارىندا جۇمىس ىستەۋگە قىزىعۋشىلىق تانىتقان جاستاردىڭ سانى ارتۋدا. بۇل تۋرالى ەلوردالىق كوممۋنيكاسيالار قىزمەتى الاڭىندا استانا قالاسى جاستار ساياساتى ماسەلەلەرى باسقارماسىنىڭ باسشىسى قايرات قامباروۆ «جاسىل ەل» باعدارلاماسى اياسىندا جاستاردى جۇمىسپەن قامتۋ» اتتى تاقىرىپتاعى بريفينگتە ايتتى.

مەملەكەت باسشىسى قاسىم-جومارت توقايەۆ جاستاردىڭ ەكولوگيالىق شارالارعا قاتىسۋىنا ءاردايىم ءمان بەرۋدە. مىسالى، لينەينىي ساياباعىندا «جاسىل استانا» اكسياسى اياسىندا 30-عا جۋىق بەلسەندىمەن اعاش وتىرعىزۋ ءىس-شاراسىنا پرەزيدەنت قاتىسىپ، جاستارعا ءوز تىلەگىن جەتكىزدى.

جاسوسپىرىمدەردى دە جۇمىسپەن قامتۋدىڭ ءبىر تەتىگى رەتىندە جىل سايىن «جاسىل ەل» مەملەكەتتىك باعدارلاماسى جۇزەگە اسىرىلادى. باعدارلاما – جاستار مەن بالالاردى ەكولوگيا مادەنيەتىنە، تابيعاتتى ايالاۋعا جانە ەڭبەككە باۋلۋعا ارنالعان يگىلىكتى باستاما. 2005 جىلدان باستاپ قولعا الىنعان بۇل جوبانىڭ بيىل XIX ماۋسىمى باستالدى. وعان 14-تەن 35 جاسقا دەيىنگى مەكتەپ وقۋشىلارى، ستۋدەنتتەر جانە جۇمىسسىز جاستار قاتىسا الادى.

«جاسىل ەل» ساربازدارى قالامىز­دىڭ قۇرىلىس نىسانىندا ءارتۇرلى ساناتتاعى شەبەرلەردىڭ (قۇرىلىس ينجەنەرى، تەحنولوگ، مونتاج-قۇرىلىس جۇمىستارىنىڭ شەبەرى) كومەكشىسى قىزمەتىن، قالا ماڭىنداعى «جاسىل بەلدەۋدە» اعاش وتىرعىزۋ، تالدار مەن كوشەتتەردى قوپسىتۋ جانە ­سۋارۋ، اعاشتار مەن كوشەتتەرگە كۇتىم جاساۋ جۇمىسى ارقىلى تابيعات پەن قالا كەلبەتى ۇندەستىك تاپقان بىرەگەي ەكوجۇيەنىڭ قالىپتاسۋىنا جانە قالا ساياباقتارى جاسىل جەلەگىنىڭ كۇتىمىمەن اينالىسىپ، تازالىق جۇمىسىن جۇرگىزەدى.

جازعى ەڭبەك ماۋسىمىندا جاستاردى جۇمىسپەن قامتۋعا «بازيس-ا» قۇرىلىس كومپانياسى، «استانا ­كوگالداندىرۋ قۇرىلىسى» اق، «استانا ورمانى» ج ش س، 100-دەن استام ءبىلىم بەرۋ مەكەمەسى، 20-عا جۋىق كوللەدج جانە 10-نان استام جوعارى وقۋ ورنى سەرىكتەس بولۋعا كەلىسىم بەردى. بىلتىر، ناقتى ايتقاندا، 4208 جاس جۇمىسپەن قامتىلسا، بيىل دا 4200 ءجاسوسپىرىم مەن جاستى قامتۋ كوزدەلگەن. ولاردىڭ قاتارىندا كوپبالالى وتباسىلاردىڭ، الەۋمەتتىك جاعىنان از قامتىلعان وتباسىلاردىڭ بالالارى، سونىمەن قاتار، اتا-اناسىنىڭ قامقورلىعىنسىز قالعان بالالار دا بار. جوباعا قاتىساتىن جاستاردىڭ بارلىعى ارنايى ەكيپيروۆكامەن قامتاماسىز ەتىلەدى.

قازىرگى تاڭدا مەكتەپ وقۋشىلارى ءوز مەكتەپتەرىنىڭ اۋلاسىن تازارتۋ جۇمىسىن باستاپ كەتتى. 14-17 جاس ارالىعىنداعى جاستار كامەلەتتىك جاسقا تولماعاندىقتان، ەڭبەك كودەكسىنە سايكەس، دەنساۋلىعىنا زيان تيگىزبەيتىن، اۋىر ەمەس، كۇنىنە 4 ساعاتتان ارتىق ەمەس جۇمىسقا جۇمىلدىرىلادى. ال جۇمىسسىز جاستار قۇرىلىس كومپانيالارىنا ورنالاسىپ، جۇمىس ورنىنان جالاقى الۋ مۇمكىندىگىنە يە. سونىمەن قاتار، «جاسىل ەل» جوباسى اياسىندا قوسىمشا 65 مىڭ تەڭگە كولەمىندە سىياقى تاعايىندالادى. جۇمىس ۋاقىتى – 8 ساعات. وسى شىلدە ايىندا 1788 جاس جۇمىسپەن قامتىلادى.