تۇركىستان وبلىسىندا تاۋ باسىنان قۇلاعان تۋريست ىزدەستىرىلىپ جاتىر، دەپ حابارلايدى توتەنشە جاعدايلار مينيسترلىگى.
سايرام-وگەم ۇلتتىق تابيعي پاركىنىڭ اۋماعىندا 3 شىلدە كۇنى ءۇش ادامنان تۇراتىن توپ تەڭىز دەڭگەيىنەن 4 236 مەتر بيىكتىكتە ورنالاسقان سايرام شىڭىنا شىققان. تاۋدىڭ باسىنان ءتۇسىپ كەلە جاتقاندا ارقان ءۇزىلىپ، 1967 جىلعى ەر ادام مۇز بويىمەن دومالاپ، ەڭىسكە قۇلايدى.
5 شىلدەدە اۋا رايىنىڭ قولايسىزدىعىنا بايلانىستى ىزدەستىرۋ جۇمىستارىن جاياۋ ءجۇرۋ ارقىلى دا، اۆياتەحنيكانى تارتۋمەن دە جۇرگىزۋگە مۇمكىندىك بولمادى.
حابارلاما تۇسكەن ساتتەن باستاپ قاسقاسۋ كەمپينگىندە تۇركىستان وبلىسى پوليسيا دەپارتامەنتى، جەرگىلىكتى اتقارۋشى ورگاندار مەن تجد، شىمكەنت قالاسى الپينيزم جانە سپورتتىق تۋريزم فەدەراسياسى قىزمەتكەرلەرىنەن شتاب ۇيىمداستىرۋ بويىنشا شارالار قابىلداندى.
6 شىلدەدە ساعات 6.30-دان باستاپ جەدەل-قۇتقارۋ جاساعىنىڭ 8 قۇتقارۋشىسى جانە الپينيزم فەدەراسياسىنان ءتورت الپينيست ىزدەۋ جۇمىستارىنا جىبەرىلدى.
قۇرىلعان شتابتان وقيعا ورنىنا دەيىنگى جالپى اراقاشىقتىق – 15 كم. تاۋ شاتقالدارىنىڭ تىك ورنالاسۋىنا جانە تابيعي كەدەرگىلەردىڭ كوپ بولۋىنا بايلانىستى قۇتقارۋ-ىزدەستىرۋ جۇمىستارى سوزىلۋى مۇمكىن.
ىزدەستىرۋ جۇمىستارىنا قوسىمشا سايرام-وگەم ۇلتتىق پاركىنىڭ ورمانشىلارىنان ات پاترۋلدەرى تارتىلادى. قۇتقارۋشىلار الپينيستتىك قۇرال-سايماندارمەن، سپۋتنيكتىك تەلەفوندارمەن، راديوبايلانىس قۇرالدارىمەن جانە 3 تاۋلىككە جەتەتىن ازىق-تۇلىكپەن قامتاماسىز ەتىلدى.
پىكىر قالدىرۋ