اتىراۋ قالاسىنىڭ جاڭا اكىمى بولىپ شاكىر كەيكىن تاعايىندالدى. بۇل تۋرالى وبلىستىق اكىمدىك حابارلادى. رەسمي دەرەك بويىنشا شاكىر كەيكىن قالا اكىمى لاۋازىمىنا پرەزيدەنت اكىمشىلىگىنىڭ كەلىسىمىمەن تاعايىندالعان.
2023 جىلدىڭ ناۋرىزىنان باستاپ شاكىر كەيكىن ساۋدا جانە ينتەگراسيا مينيسترلىگىنىڭ ساۋدا دەپارتامەنتىنىڭ باسشىسى قىزمەتىن اتقاردى.
ال 2019-2022 جىلدار ارالىعىندا ماقات اۋدانىنىڭ اكىمى قىزمەتىن اتقارعان. قاڭتار وقيعاسى كەزىندە ماقات اۋدانى تۇرعىندارى جاڭاوزەن تۇرعىندارىن قولداۋ ءۇشىن نارازىلىققا شىعادى. العاشقى كۇنى شاكىر كەيكىن حالىق الدىنا شىعىپ باسۋ ايتقان. الايدا ەكىنشى كۇننەن باستاپ اۋدان اكىمى حالىق الدىنا شىقپاي قويادى. حالىق اۋدان اكىمى مەن پوليسيا بولماعان سوڭ اۋدان ىشىندەگى ءتارتىپتى وزدەرى قاداعالاۋعا كوشكەن.
ازاتتىق باسىلىمىنىڭ دەرەگىنشە، سول ۋاقىتتا حالىق ءبىر اۋىزدان بەلسەندى عازيز ءعابدۋلليندى اۋدان اكىمى ەتىپ سايلايدى.
5 قاڭتاردا اۋداندىق ماسليحات دەپۋتاتتارى شاكىر كەيكىنگە سەنىمسىزدىك بىلدىرەتىنى تۋرالى حاتتاما تولتىرىپ، عازيز ءعابدۋلليننىڭ كانديداتۋراسىنا قولداۋ بىلدىرەدى.
سودان كەيىن ءعابدۋلليننىڭ اتىراۋ وبلىسىنىڭ اكىمى ماحامبەت دوسمۇحامبەتوۆپەن كەزدەسۋى ءوتتى، ول ءعابدۋليندى اۋدان اكىمى لاۋازىمىنا بەكىتۋ تۋرالى ماسەلەنى قاراۋعا ۋادە بەردى. ءبىراق جاعدايدى تۇراقتاندىرعاننان كەيىن شاكىر كەيكىن ءوز قىزمەتىنە ورالدى.
پىكىر قالدىرۋ