ءماجىلىس سپيكەرى، «اماNات» پارتياسىنىڭ ءتوراعاسى ەرلان قوشانوۆ تۇركىستان وبلىسىندا بولدى. وندا وڭىردەگى الەۋمەتتىك نىسانداردى، كاسىپورىنداردى ارالاپ، تۇرعىندارمەن پارتيالىق جوبالاردىڭ ىسكە اسىرىلۋ بارىسىن تالقىلادى.

پالاتا سپيكەرى ساپارىن سايرام اۋدانىنداعى ءسۇت ونىمدەرىن وندىرەتىن كاسىپورىن «AYKAN» جاۋاپكەرشىلىگى شەكتەۋلى سەرىكتەستىگىن ارالاۋدان باستادى. مۇندا «اۋىل اماناتى» پارتيالىق جوباسىنا اتسالىسقان شارۋا قوجالىقتارى باسشىلارىنىڭ قاتىسۋىمەن باعدارلامانىڭ ىسكە اسىرىلۋ بارىسى تالقىلاندى. اتالعان جوبا اۋىل-ايماقتا كاسىپكەرلىكتى قولداۋعا باعىتتالعان.

–  «اۋىل اماناتى» جوباسى – اۋىل ازاماتتارى ءۇشىن تابىسىن ارتتىرۋعا زور مۇمكىندىك. بۇل، اسىرەسە، تۇرعىندارىنىڭ كوبى اۋىلدا تۇراتىن تۇركىستان وبلىسى سياقتى حالقى تىعىز ءوڭىر ءۇشىن وزەكتى. بيىل وسى باعدارلاما بويىنشا بولىنەتىن بارلىق قاراجاتتىڭ بەستەن ءبىر بولىگى ءدال وسىندا باعىتتالادى. بۇل – شامامەن 20 ميلليارد تەڭگە. 3،5 مىڭعا جۋىق ادامعا جاڭا جۇمىس ورىندارى اشىلادى، – دەدى ەرلان قوشانوۆ.

وبلىستا «اۋىل اماناتى» جوباسىن ىسكە اسىرۋ قورىتىندىسى بويىنشا وعان قاتىسۋشىلاردىڭ ورتاشا ايلىق تابىسىن 1،5 ەسە، ءسۇت ونىمدەرىن ءوندىرۋدى 40،6 پايىزعا، ەتتى 63،2 پايىزعا، جىلىجاي ونىمدەرىن 30 پايىزعا ۇلعايتۋ جوسپارلانعان. جالپى بيىل جوبا اياسىندا ەلىمىز بويىنشا 17 مىڭ ادامدى قامتۋ كوزدەلىپ وتىر.

سونداي-اق ەرلان قوشانوۆ «قارىزسىز قوعام» جوباسىنا قاتىسۋشىلارمەن كەزدەستى. جوبا قارجىلىق ساۋاتتىلىقتى ارتتىرىپ، قارجىنى دۇرىس جۇمساۋعا ۇيرەتەدى. جوبانى ءوڭىر تۇرعىندارى جوعارى باعالاپ وتىر. ءماجىلىس ءتوراعاسىنىڭ ايتۋىنشا، ءقازىر ەلىمىزدە 7،5 ملن ادامنىڭ، ياعني حالىقتىڭ ۇشتەن ءبىر بولىگىنىڭ بانكتە قارىزى بار. شامامەن 1،5 ميلليون ازامات نەسيەسىن 90 نەمەسە ودان دا كوپ كۇنگە كەشىكتىرىپ تولەۋدە جانە بانكروتتىق كۇي كەشۋدە. بۇگىندە بۇل ماسەلە مەملەكەت دەڭگەيىندە كوتەرىلدى.

– ونداي ادامدار قايدا بارىپ، كىمنەن كومەك سۇرايتىنىن دا بىلمەيدى. اينالىپ كەلگەندە، بارلىعى  قارجىلىق ساۋاتسىزدىققا كەلىپ تىرەلەدى. سوندىقتان «AMANAT» پارتياسى «قارىزسىز قوعام» جوباسىن قولعا الىپ وتىر. ەكى ايدا ەلىمىزدىڭ ءبىرقاتار وڭىرىندە 20 مىڭنان استام ادام وقىتىلدى. جىل سوڭىنا دەيىن بۇل كورسەتكىش بۇكىل ەل بويىنشا 80 مىڭعا جەتكىزىلەدى. ترەنەرلەر حالىققا قارجىنى دۇرىس يگەرۋدى، وتباسىلىق بيۋدجەتتى جوسپارلاۋدى، نەسيەنى دۇرىس الۋدى ۇيرەتەدى،– دەدى ءماجىلىس ءتوراعاسى.

جالپى پالاتا سپيكەرى پرەزيدەنتتىڭ ساياساتى مەن «AMANAT» پارتياسىنىڭ جوبالارى ارقاسىندا بۇگىندە اۋىلداعى بەلسەندى ازاماتتار ءۇشىن جاڭا ءارى ۇلكەن مۇمكىندىكتەرگە جول اشىلعانىن اتاپ ءوتتى.

– پارتيانىڭ جوبالارى حالىققا زاڭ شەڭبەرىندە قارىزدان قۇتىلۋعا، قارجىلىق ساۋاتتىلىقتى ۇيرەنۋگە، ءوز ءىسىن جۇرگىزۋ ءۇشىن مەملەكەتتەن ءتيىمدى نەسيە الۋعا كومەكتەسەدى. سونىمەن قاتار ءبىراز اۋىل شارۋاشىلىعى جەرلەرى مەملەكەتكە قايتارىلىپ جاتىر. ولار دا حالىقتىڭ يگىلىگىنە بەرىلەدى. ەندىگى كەزەكتە ەڭ باستىسى – بەلسەندىلىك تانىتىپ، وسى مۇمكىندىكتەردى پايدالانۋ. ءبىزدىڭ مىندەتىمىز – حالىققا بالىق ەمەس، قارماق بەرۋ. ادامداردىڭ ءوزىن-وزى دامىتۋىنا مۇمكىندىكتەر جاساساق، سوندا جۇمىس ىستەپ، وزدەرىن لايىقتى تۇردە قامتاماسىز ەتە الادى، – دەدى ءماجىلىس ءتوراعاسى.

قازىعۇرت اۋدانى، شاربۇلاق اۋىلىنداعى دانيار قاراتايەۆتىڭ شارۋاشىلىعى – وسىنىڭ ايقىن دالەلى. ەرلان قوشانوۆ بۇل شارۋاشىلىققا دا ات باسىن بۇردى. قارىزى كوپ، تۇراقتى جۇمىس ورنى جوق اۋىل تۇرعىنى «قارىزسىز قوعام» جوباسى بويىنشا وقىپ، كەيىن «اۋىل اماناتى» جوباسىمەن 4 ملن تەڭگە نەسيە العان. 8 ساۋىن سيىر ساتىپ الىپ، ءسۇت ءوندىرىسىن جولعا قويىپ وتىر. ءقازىر دانيار قاراتايەۆتىڭ تۇراقتى تابىسى بار.

سونىمەن قاتار ءماجىلىس سپيكەرى سايرام اۋدانى اقسۋكەنت اۋىلىنداعى 1200 وقۋشىعا ارنالعان «ءال-فارابي» اتىنداعى مەكتەپكە باردى. بۇل ءبىلىم ورداسىن 2022 جىلى وڭىرگە بەلگىلى مەسەنات، پارتيا ارداگەرى نيزامحان سۋلايمانوۆ جەكە قاراجاتىنا سالىپ بەردى. مەسەنات ءوز اۋدانىندا وسىنداي 7 مەكتەپ سالدىرعان.

– تۇركىستاندا وتكەن سوڭعى قۇرىلتايدا پرەزيدەنتىمىز جاۋاپتى ازاماتسىز ادىلەتتى قازاقستاندى قۇرۋ مۇمكىن ەمەس ەكەنىن ايتتى. بۇل ادام ەل يگىلىگى جولىندا ادال ەڭبەك ەتىپ، تۋعان جەردىڭ دامۋى ءۇشىن بارىن سالىپ ءجۇر. ول ءوزىنىڭ ناعىز پاتريوت ەكەنىن سوزىمەن ەمەس، ىسىمەن دادەلدەدى. سايرام ءوڭىرىنىڭ كاسىپكەرلەرى – وسى جاۋاپتى ازاماتتىڭ جارقىن ۇلگىسى، – دەدى ءماجىلىس ءتوراعاسى.

 ەرلان قوشانوۆ قۇتارىس اۋىلىنداعى تولىقتاي جەكە قاراجاتقا سالىنعان جاڭا سپورت كەشەنىندە دە بولدى. ول پارتيا مۇشەلەرىنە بيزنەستىڭ الەۋمەتتىك جاۋاپكەرشىلىگىنىڭ وسىنداي ۇلگىلەرىن رەسپۋبليكا دەڭگەيىندە كوبىرەك ناسيحاتتاۋدى تاپسىردى.

سونداي-اق وڭىردە ءماجىلىس سپيكەرى «جەر اماناتى» جانە «قۇقىقتىق كومەك» پارتيالىق جوبالارىنىڭ جۇزەگە اسىرىلۋ بارىسىمەن تانىسىپ، حالىقتىڭ ۇسىنىستارىن تىڭدادى. «قارىزسىز قوعام» جوباسىنىڭ ءبىرقاتار قاتىسۋشىسى «اماNات» پارتياسىنىڭ قاتارىنا قوسىلدى. جاڭا مۇشەلەردىڭ ايتۋىنشا، ولاردىڭ كەلۋىنە پارتيانىڭ قاراپايىم حالىققا سوزبەن ەمەس، ناقتى ءىس جۇزىندە كومەكتەسەتىنى سەبەپ بولعان.