قاراعاندىلىق پوليسەيلەر سينتەتيكالىق ەسىرتكى دايارلايتىن زەرتحانانى انىقتادى، دەپ حابارلايدى Polisia.kz.
4 شىلدە كۇنى قاراعاندى قالالىق پوليسيا باسقارماسىنىڭ ەسىرتكى قىلمىستارىنا قارسى ءىس-قيمىل ءبولىمىنىڭ قىزمەتكەرلەرى "قاراسورا" جەدەل الدىن الۋ ءىس-شاراسى بارىسىندا قالاداعى ساياجايلاردىڭ بىرىنەن 28 جاستاعى ازاماتتى ۇستادى. ۇستالعان ازامات قالا اۋداندارىنىڭ ءار جەرىنە 20-30 ورامنان سينتەتيكالىق ەسىرتكى جاسىرىپ كەتكەنىن مويىندادى.
ۇستالعان ازاماتتىڭ سينتەتيكالىق ەسىرتكى جاسىرعان جەرلەرىنە جۇرگىزىلگەن ءتىنتۋ جۇمىستارى بارىسىندا پوليسيا قىزمەتكەرلەرى 3 ورام، جالپى سالماعى 100 گرامم بولاتىن سينتەتيكالىق ەسىرتكىگە ۇقساس زاتتار تاركىلەدى.
كۇدىكتى جالعا العان پاتەردى ءتىنتۋ بارىسىندا سينتەتيكالىق ەسىرتكى وندىرەتىن زەرتحانا تابىلعان.
"پوليسيا قىزمەتكەرلەرى وقيعا ورنىنان سينتەتيكالىق ەسىرتكى زاتىن پىسىرۋگە ارنالعان يندۋكسيالىق تاقتا، ەكى تەرمومەتر، ەكى رەسپيراتور، پلاستيكالىق ىدىستار جانە سينتەتيكالىق ەسىرتكىنى ولشەۋگە ارنالعان زاتتار، سونداي-اق ساتۋعا دايىن 500 گرامم سينتەتيكالىق ەسىرتكى تاركىلەدى"، – دەدى قاراعاندى وبلىستىق پوليسيا دەپارتامەنتى باستىعىنىڭ ورىنباسارى ءابىل ءابىلدين.
ساراپتاما قورىتىندىسىنا سايكەس، تاركىلەنگەن زاتتار سينتەتيكالىق ەسىرتكى زاتى ەكەنى بەلگىلى بولدى. كۇدىكتى ۋاقىتشا ۇستاۋ يزولياتورىنا قامالدى. اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 297-بابى 3-تارماعىنا سايكەس قىلمىستىق ءىس قوزعالدى. تەرگەۋ امالدارى جۇرگىزىلىپ جاتىر.
پىكىر قالدىرۋ