كەلەسى اپتادا شەتەلدە ەسەپتەن شىعارىلماعان كولىكتەردى ۋاقىتشا تىركەۋ شارالارى باستالادى. بۇل تۋرالى اكىمشىلىك پوليسيا كوميتەتىنىڭ ءتوراعاسى قايسار سۇلتانبايەۆ مالىمدەدى.
شەتەلدىك كولىكتەردى زاڭداستىرۋ بارىسىندا كوپتەگەن جۇرگىزۋشىلەر ءوز كولىگىن وزگە ەلدىڭ ەسەبىنەن شىعارا المادى. ونداي اۆتوكولىكتەردى زاڭداستىرۋدى كەيىنگە قالدىرۋعا شەشىم قابىلداندى. ءبىراق ولاردى ۋاقىتشا تىركەۋگە قويۋ قاجەت.
"ۋاقىتشا ەسەپكە قويۋ كەزىندە قازاقستان رەسپۋبليكاسىنىڭ كولىك قۇرالىن تىركەۋ تۋرالى كۋالىگى جانە مەملەكەتتىك نومىرلىك بەلگىلەرى بەرىلەتىن بولادى تىركەۋ تۋرالى كۋالىكتە "ۋاقىتشا ەسەپكە الۋ، يەلىكتەن شىعارۋ جانە قازاقستان رەسپۋبليكاسىنان تىس جەرلەرگە شىعۋ قۇقىعىنسىز" دەگەن جازبالارى كورسەتىلەدى"، - دەدى سۇلتانبايەۆ ورتالىق كوممۋنيكاسيالار قىزمەتىندە وتكەن بريفينگتە.
ال شەتەلدىك تىركەۋ قۇجاتتارى مەن مەملەكەتتىك بەلگىلەرى مەملەكەتتىك كورپوراسياعا ساقتاۋعا تاپسىرىلاتىن بولادى.
ونىڭ ايتۋىنشا، ۋاقىتشا تىركەۋگە قويىلعان اۆتوكولىكتەردى ەلدەن تىس جەرلەرگە اكەتۋگە شەشىم قابىلدانسا، قازاقستاننىڭ تىركەۋ قۇجاتتارى مەن مەملەكەتتىك نومىرلەرىن تاپسىرۋ كەرەك. سودان كەيىن ولارعا شەت مەملەكەتتىڭ تىركەۋ قۇجاتتارى مەن مەملەكەتتىك نومىرلەرى قايتارىلادى.
"ال ەگەر وسى اۆتكولىكتەردى قازاقستان ازاماتتارى قازاقستاندا باستاپقى تىركەۋدى جۇزەگە اسىرۋ تۋرالى شەشىم قابىلداسا، الدىمەن، بۇرىنعى تىركەلگەن ەلىندە ەسەپتەن شىعارادى. سوسىن 200 000 تەڭگە مولشەرىندە باستاپقى تىركەۋ ءۇشىن الىم تولەيدى. ياعني، ولارعا زاڭداستىرۋ شارتتارى قولدانىلاتىن بولادى جانە ۋتيليزاسيالىق الىم تولەنبەيدى"، - دەپ اتاپ كورسەتتى سۇلتانبايەۆ.
ۋاقىتشا تىركەۋ شارالارى 17 شىلدەدە باستالادى. قازىرگى كەزدە ونداي كولىكتەردى ۋاقىتشا ەسەپكە قويۋ ءۇشىن ءتيىستى سەرۆيس ازىرلەنىپ جاتىر.
