قاڭتاردا وققا ۇشقان 4 جاسار ايكوركەم مەلدەحاننىڭ ءىسى بويىنشا سوت باستالدى. تىڭدالىم الماتى گارنيزونى اسكەري سوتىندا ءوتتى.
ايكوركەمنىڭ ولىمىنە اسكەري قىزمەتكەر ارمان جۇمان ايىپتالىپ جاتىر. وعان "بيلىگىن اسىرا پايدالاندى" دەگەن ايىپ تاعىلعان.
سوتقا ايكوركەمنىڭ اكەسى مەن ب ا ق وكىلدەرى قاتىستىرىلماعان. اسكەري قىزمەتكەر رەتىندە ايكوركەمنىڭ اعاسى عانا تىڭدالىمعا قاتىسۋعا رۇقسات العان.
سوت قىزمەتكەرى رۇستەم مۇحتاروۆتىڭ ايتۋىنشا، ءىس ماتەريالدارى مەملەكەتتىك قۇپيا بولعاندىقتان سوت جابىق وتەدى.
كەلەسى سوت وتىرىسى 26 شىلدەدە وتەدى. رەسمي تۇردە جابىرلەنۋشى دەپ تانىلعان ايكوركەمنىڭ اكەسى ايدوس مەلدەحان ۇلى مەن اپكەسى جانەل مەلدەحان سوتقا قاتىسپايدى.
"تۋعان اكەسىن سوتقا قاتىستىرماۋ — بارىپ تۇرعان سوراقىلىق. بۇل بيلىكتىڭ تاپسىرماسى ەكەنىن ايتپاسا دا تۇسىنىكتى. قىزىمدى بيلىك اتىپ تاستادى. ەندى قىلمىستارىن جاسىرۋ ءۇشىن سوتتى ادەيى جابىق وتكىزىپ جاتىر" - دەدى ايكوركەمنىڭ اكەسى ايدوس مەلدەحان.
ادۆوكات جانعازى كۇنسەركين سوتتى اشىق وتكىزۋدى تالاپ ەتىپ، سوتقا شاعىم ءتۇسىردى. الايدا سۋديا سوتتىڭ "قۇپيا" ستاتۋسىن وزگەرتپەي، جابىق جاعدايدا وتكىزۋگە قاۋلى شىعاردى.
پىكىر قالدىرۋ