ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەلەرى ق ر ۇقك شەكارا اكادەمياسى كۋرسانتتارىنا ارنالعان لاگەردە ءۇش كۇننەن بەرى وقۋ-جاتتىعۋ جيىنىنا قاتىسۋدا.

ولار – ءماجىلىس دەپۋتاتتارى ماكسيم روجين، ولجاس قۇسپەكوۆ، بولات كەرىمبەك جانە سامات نۇرتازا. كۋرسانتتارمەن بىرگە اپتا بويى تاۋداعى لاگەردە تۇرىپ، جاتتىعادى. سودان كەيىن دەپۋتاتتار جۇڭگو جانە قىرعىزستانمەن مەملەكەتتىك شەكارانى قورعايتىن بولادى. 

دەپۋتاتتار شەكارا اسكەرلەرى سوڭعى ۇلگىدەگى تەحنيكامەن جابدىقتالىپ، وندا ۇزدىكتەردىڭ ۇزدىكتەرى قىزمەت ەتۋى كەرەك دەپ ەسەپتەيدى. ويتكەنى ەلىمىزدىڭ قاۋىپسىزدىگىن قامتاماسىز ەتۋ بويىنشا ەڭ كۇردەلى جاۋىنگەرلىك مىندەتتەردى كۇن سايىن ورىندايتىن – وسى شەكاراشىلار.

–تاۋەلسىزدىك شەكارادان باستالادى. شەكاراشىلارىمىزدىڭ دايىندىعى جوعارى، وتان يگىلىگى ءۇشىن ادال قىزمەت ەتۋگە دايىن ەكەنىن كورىپ وتىرمىز. بيىك تاۋداعى شەكارانى قورعاۋدىڭ قىر-سىرىمەن تانىستىق. بۇل وتە كۇردەلى دە ناعىز ەرلەرگە لايىق جۇمىس. لاگەر كوماندادا جۇمىلىپ جۇمىس ىستەۋگە ۇيرەتەدى، - دەدى دەپۋتات ماكسيم روجين.

دەپۋتاتتار كۋرسانتتارمەن بىرگە شاتىرلاردا تۇرادى. تاۋلى ايماقتا ەرتە تۇرىپ، ساپقا تۇرىپ، تاكتيكالىق تاپسىرمالار مەن  جاۋىنگەرلىك دايىندىقتان وتەدى. ولار تاۋعا كوتەرىلۋدى، تولىق قارۋ-جاراقپەن بىرنەشە شاقىرىمدىق مارش لاقتىرۋدى ۇيرەنەدى.

– كۇندىز اۋا تەمپەراتۋراسى +32، تۇندە +4 بولاتىن تاۋلارداعى شاتىرلاردا تۇرۋ. تاڭەرتەڭگى ساعات 6-دا ويانۋ، قولايلى جاعدايدىڭ جوقتىعى – وسىنىڭ ءبارى ءبىزدىڭ شەكاراشىلار جاعدايى. بۇل سابىرلىلىققا، توزىمدىلىككە تاربيەلەيدى. اسكەردەگى قىزمەت – ۇلدارىمىزدى ەر-ازامات قىلىپ تاربيەلەيتىن پاتريوتتىق ورتا.  جاۋاپكەرشىلىكتىڭ، ءتارتىپتىڭ نە ەكەنىن ءتۇسىنۋدىڭ جالعىز جولى وسى. مۇمكىندىگىنشە جاستارىمىز وسىدان ءوتۋى كەرەك، – دەيدى ولجاس قۇسبەكوۆ.

جاعداي مەن تۇرمىس-تىرشىلىكتى زەردەلەۋمەن قاتار، دەپۋتاتتار اسكەري قىزمەتشىلەرمەن اڭگىمە-دۇكەن قۇرىپ، ماتەريالدىق-تەحنيكالىق قامتاماسىز ەتۋ، ەڭبەكاقى جانە باسقا دا ءبىرقاتار جۇيەلى ماسەلەلەردى انىقتادى.

– مەملەكەت باسشىسى اسكەري قىزمەتشىلەر ءۇشىن جاعدايدى جاقسارتۋ قاجەتتىگىنە بىرنەشە رەت نازار اۋداردى. ەلورداعا ءار ساربازدىڭ، ءار وفيسەردىڭ ماسەلەسىن جەتكىزەمىز. كۇردەلى پروبلەمالاردىڭ ءبىرى – وفيسەرلەردىڭ جالاقىسىنىڭ تومەندىگى، ورتا ەسەپپەن 170-220 مىڭ تەڭگە. بۇگىنگى نارىقپەن بۇل وتە از. تۇرعىن ءۇي، الەۋمەتتىك قامسىزداندىرۋ ماسەلەلەرى بار. ءاربىر زاستاۆادا ءتيىستى تەحنيكالىق قۇرالداردىڭ بولۋى ماڭىزدى. دروندار، زاماناۋي قارۋ-جاراق، كولىك بولۋى كەرەك، – دەيدى ءماجىلىس دەپۋتاتى سامات نۇرتازا.

جوبا بارىسىندا دەپۋتاتتار ۇلتتىق قاۋىپسىزدىك جۇيەسىن جەتىلدىرۋگە باعىتتالعان جاڭا زاڭنامالىق باستامالار مەن شارالاردى، جاستاردى وتانسۇيگىشتىككە تاربيەلەۋدەگى تاسىلدەردى، سونداي-اق اسكەردە قىزمەت ەتۋ جاعدايلارىن جاقسارتۋ قاجەتتىلىگىن زەردەلەۋدى كوزدەپ وتىر.