بۇگىن اقىن، جازۋشى، ق ر «ەرەڭ ەڭبەگى ءۇشىن» مەدالىنىڭ، «اباي» مەدالىنىڭ يەگەرى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى تىنىشتىقبەك ابدىكاكىم ۇلىنىڭ تۋعان كۇنى. اقىن مەرەيلى 70 جاسقا تولىپ وتىر.
⠀
وسىعان وراي وبلىس اكىمى نۇرلان ۇرانحايەۆ اقىندى مەرەيلى جاسىمەن قۇتتىقتاپ، قۇرمەت كورسەتتى.

⠀
«تىنىشتىقبەك ابدىكاكىم ۇلى ءسىزدى 70 جاس مەرەيتويىڭىزبەن شىن جۇرەكتەن قۇتتىقتايمىن! ءسىز مەرەيلى جاسقا تولىپ جاتقاندا وزىڭىزبەن بەتپە-بەت كەزدەسىپ، كوزبە-كوز قۇتتىقتاۋدى ءجون سانادىق. ادەبيەتتى باعىندىرۋ ءۇشىن الماتى نەمەسە استاناعا كەتپەي-اق، تۋعان جەردە ءجۇرىپ تە قولتاڭبا قالدىرۋعا بولاتىنىن دالەلدەگەن بىردەن ءبىر اقىن ءوزىڭىز. ءسىزدىڭ تۋعان جەرگە دەگەن ادالدىعىڭىز – كوپكە ۇلگى-ونەگە.سوناۋ 90-جىلداردىڭ باسىندا ادەبيەت الەمىنە اتىڭىزدى شىعارعان «اقشام حاتتارى» جىر جيناعىڭىز ءبارىمىزدىڭ ەسىمىزدە. ودان كەيىن دە كوپتەگەن ولەڭدەر جيناعىڭىز جارىق كوردى. سىزگە قاراپ بوي تۇزەپ، سىزگە ەلىكتەپ ولەڭ جازعىسى كەلەتىن ارتىڭىزدا بىرنەشە بۋىن ءوسىپ جەتىلدى. بۇنىڭ ءبارى ءسىزدىڭ قالام ۇستاعان وي ەڭبەگىڭىزدىڭ ارقاسى دەپ بىلەمىز.الداعى ۋاقىتتا دا ادەبي مۇراڭىز كوبەيە بەرەتىنىنە سەنەمىز. ەڭ باستىسى وزىڭىزگە دەنساۋلىق، وتباسىڭىزعا اماندىق تىلەيمىن»، - دەدى اباي وبلىسىنىڭ اكىمى نۇرلان ۇرانحايەۆ.

⠀
جازۋشى شىعارماشىلىعىنىڭ اباي ءوڭىرىنىڭ تۇرعىندارى ءۇشىن الار ورنى ەرەكشە ەكەنى ءسوزسىز. ونىڭ شىعارمالارى زەرتتەۋ جۇمىسىنىڭ وبەكتىسى، ول ءوز ەڭبەكتەرىندە دۇنيە جۇزىندەگى حالىقتارعا ورتاق ەجەلگى قاعيدالار مەن كيەلى ۇعىمداردى قازاقتىڭ ۇلتتىق دۇنيەتانىمى ارقىلى تالداي بىلگەن.
⠀
ايتا كەتەيىك، تىنىشتىقبەك ابدىكاكىم ۇلى 1953 جىلى 20 شىلدەدە اباي اۋدانىندا تۋعان. سەمەي وبلىستىق مادەنيەت باسقارماسىنىڭ عىلىمي-مەتوديكالىق ورتالىعىندا رەداكتور، ابايدىڭ رەسپۋبليكالىق تاريحي-مادەني، ادەبي مەموريالدىق قورىق-مۋزەيىندە عىلىمي قىزمەتكەر، رەسپۋبليكالىق «الاش ءۇنى» گازەتىندە كەڭەسشى جانە قىزمەتىن اتقارعان.

تىنىشتىقبەك ابدىكارىم ۇلى قازاقستان جازۋشىلار وداعىنىڭ مۇشەسى. قالامگەردىڭ «اقشام حاتتارى»، «ىراۋان»، «القوڭىر دۇنيە»، «بەسىنشى ماۋسىم جۇپارى» اتتى جىر جيناقتارىنىڭ، قازاقتىڭ ۇلتتىق دۇنيەتانىمى ارقىلى وزىنشە سارالاپ-ساراپتاۋعا تىرىسقان «قاس ساق اڭقىماسى» اتتى ەڭبەكتەرى جانە باسقا دا شىعارمالارى جارىق كورگەن.