الماتىداعى الپينيزم فەدەراسياسى ىلە الاتاۋىنداعى نۇرسۇلتان شىڭىنىڭ اتى الماتى شىڭى دەپ وزگەرگەنى تۋرالى كەيبىر اقپارات قۇرالدارى تاراتقان اقپاراتتى تەرىسكە شىعاردى.

وسىعان دەيىن بۇقارالىق اقپارات قۇرالدارىندا نۇرسۇلتان شىڭى ەسكى اتاۋىنا - الماتى شىڭى دەپ وزگەرتىلگەنى تۋرالى اقپارات پايدا بولعان ەدى. الايدا فەدەراسيا بۇل مالىمدەمەنى جوققا شىعاردى.

"قۇرمەتتى دوستار، بيىل 8-9 شىلدەدە الماتى الپينيزم فەدەراسياسى ىلە الاتاۋىنىڭ ءبىر شىڭىندا - قالانىڭ ۆيزيت كارتاسى الماتى شىڭىندا الپينيادا وتكىزدى، ول كومسومول شىڭى (1935-1997 جىلدارى)، نۇرسۇلتان شىڭى (1997 جىلدان قازىرگى ۋاقىتقا دەيىن) دەپ تە اتالادى. ءارتۇرلى دەرەككوزدەردە شىڭ ءۇش اتاۋمەن اتالادى. بۇل رەتتە الماتى شىڭى، مۇراعاتتىق دەرەكتەرگە سايكەس، شىڭنىڭ تاريحي ءبىرىنشى اتاۋى (1935 جىلعا دەيىن).

فەدەراسيا قۇزىرەتىنە گەوگرافيالىق نىساندار اتاۋىن وزگەرتۋ كىرمەيدى. الايدا، فەدەراسيانىڭ ۆەب-سايتىنداعى تەحنيكالىق قاتەگە بايلانىستى، دەرەكتەردى تەكسەرمەي، بۇقارالىق اقپارات قۇرالدارى شىڭنىڭ اتاۋى وزگەرتىلگەنى تۋرالى اقپارات تاراتتى. سالدارىنان شاتاسۋ پايدا بولدى. قازىرگى ۋاقىتتا گەوگرافيالىق نىسانداردىڭ رەسمي تىزىمىنە سايكەس بۇل شىڭ نۇرسۇلتان شىڭى دەپ اتالادى"، - دەپ حابارلادى الپينيزم فەدەراسياسى.

قازاقستاننىڭ بۇرىنعى پرەزيدەنتى نۇرسۇلتان نازاربايەۆ 1997 جىلى الپينيستەرمەن بىرگە كومسومول شىڭىنا شىققان سوڭ شىڭنىڭ اتىن نۇرسۇلتان شىڭى دەپ وزگەرتكەن.