بەلگىلى اكتەر ازامات ساتىبالدى شاكەن ايمانوۆ اتىنداعى «قازاقفيلم» اكسيونەرلىك قوعامىنىڭ پرەزيدەنتى قىزمەتىنە تاعايىندالدى. بۇل تۋرالى مادەنيەت جانە سپورت مينيسترلىگىنىڭ باسپا ءسوز قىزمەتى حابارلادى.
كينوستۋديا ۇجىمىنا جاڭا باسشىنى مادەنيەت جانە سپورت ءمينيسترى اسحات ورالوۆ تانىستىردى. مينيستر «قازاقفيلم» كينوستۋدياسىنىڭ جۇمىسىن ۇيلەستىرۋ ابىرويلى ءارى جاۋاپتى مىندەت ەكەنىن ايتتى.
"وتاندىق كينوونەرىنىڭ قارا شاڭىراعى سانالاتىن قازاقفيلم اۋقىمدى جانە كۇردەلى وندىرىستىك ۇيىم. بىلتىر كينوستۋديا جانىنان قازاقانيماسيا شىعارماشىلىق بىرلەستىگى قۇرىلدى. مەملەكەت باسشىسىنىڭ كينوستۋديا جۇمىسىن جاڭعىرتۋ جونىندەگى تاپسىرماسىن ىسكە اسىرۋ ءۇشىن 87 تەحنيكالىق جابدىق ساتىپ الىندى. الداعى ۋاقىتتا، مودەرنيزاسيانىڭ ەكى كەزەڭىن باستاۋ كەرەك"- دەدى اسحات ورالوۆ.
ەسكە سالا كەتەيىك، ازامات ساتىبالدى ۇزاق ۋاقىت م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ەڭبەك ەتتى. عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىن باسقاردى. بۇگىنگى كۇنگە دەيىن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى قىزمەتىن اتقاردى، دەپ حابارلادى ۆەدومستۆونىڭ باسپا ءسوز قىزمەتى.
پىكىر قالدىرۋ