28 شىلدەگە قاراعان ءتۇنى قاماۋداعى جۋرناليست دۋمان مۇحاممەدكارىمنىڭ ون شاقتى جاقتاسى قونايەۆ قالاسىنداعى الماتى وبلىستىق پروكۋراتۋراسىنىڭ الدىندا تۇنەپ شىقتى.

ولار اشتىق جاريالاپ جاتقان قاماۋداعى جۋرناليست دۋمان مۇحاممەدكارىمنىڭ تالاپتارىن ورىنداپ، ونى تالدىقورعاننان الماتىداعى تەرگەۋ يزولياتورعا اۋىستىرمايىنشا بۇل جەردەن كەتپەيتىنىن ايتقان. بۇل تۋرالى ازاتتىق راديوسى حابارلادى.

جۇما كۇنى كۇندىز پروكۋراتۋرا الدىنا جينالعاندار قاراسى كوبەيە تۇسكەن.

بەلسەندى مۇرات وسپانوۆتىڭ ايتۋىنشا، تۇنگى ساعات 12-لەر شاماسىندا پوليسيا قىزمەتكەرلەرى ولاردىڭ نە ءۇشىن تۇرعاندارىن سۇراعان. ءبىراق پروكۋراتۋرا الدىنا قونۋلارىنا كەدەرگى جاساماعان. 

ەسكە سالا كەتەيىك، بۇعان دەيىن وبلىستىق پروكۋراتۋرانىڭ دۋمان مۇحاممەدكارىمدى الماتىداعى تەرگەۋ يزولياتورىنا اۋىستىرۋعا كەلىسكەنى حابارلانعان ەدى. ادۆوكاتى عالىم نۇرپەيىسوۆتىڭ ايتۋىنشا، 5 شىلدەدەن بەرى اشتىق جاريالاپ جاتقان جۋرناليست دۋمان مۇحاممەدكارىمنىڭ جاعدايى ناشار.