سىبايلاس جەمقورلىققا قارسى قىزمەت بۇرىنعى يندۋستريا جانە ينفراقۇرىلىمدىق دامۋ ۆيسە-مينيسترى تيمۋر توقتابايەۆقا قاتىستى سوتقا دەيىنگى تەرگەۋ ىستەرى اياقتالعانىن مالىمدەدى.
توقتابايەۆ قوستاناي وبلىسىنداعى قاتتى پايدالى قازبالاردىڭ (نيكەل جانە كوبالت) ءىرى قورى انىقتالعان "شيەۆچەنكوۆسكوە" كەن ورنىن بارلاۋ جۇرگىزەمىز دەگەن سىلتاۋمەن اۋكسيون وتكىزبەي، زاڭسىز ساتقان دەپ ايىپتالعان بولاتىن.
"شيەۆچەنكوۆسكوە" كەن ورنىن بىرەگەي نيكەل جانە كوبالت تۇرىندەگى قاتتى پايدالى قازبالار 100 ملن توننا 5،7 ترلن تەڭگە سوماسىنا باعالانادى.
تەرگەۋ بارىسىندا اتالعان كەن ورنى مەملەكەت پايداسىنا قايتارىلدى.
باس پروكۋراتۋرا ايىپتالۋشى ت. توقتابايەۆتىڭ ءىستىن سوتقا بەردى.
ەسكە سالايىق، 2016-2019 جىلدار ارالىعىندا يندۋستريا جانە ينفراقۇرىلىمدىق دامۋ ۆيسە-مينيسترى بولعان تيمۋر توقتابايەۆ 2022 جىلدىڭ قاراشا ايىندا قاماۋعا الىنعان. تەرگەۋ سوت سانكسياسىمەن ت.توقتابايەۆتىڭ جانە ونىڭ جاقىن تۋىستارىنىڭ (ەليتالىق جەكە ۇيلەر، جەر ۋچاسكەلەرى، Cadillac Escalade ماركالى اۆتوكولىكتەرى، Mercedes-Benz Maybach S580 4 Matic، ەكى BMW X5 Xdrive40I، Bentley Bentayga V8) قىمبات جىلجىمالى جانە جىلجىمايتىن مۇلكى انىقتالعان ەدى.
پىكىر قالدىرۋ