الماتى تاۋلارىندا ءۇش تاۋلىكتەن بەرى ەر ادام ىزدەستىرىلىپ جاتىر، - دەپ حابارلايدى تجم باسپا ءسوز قىزمەتى.

5 تامىزدا 39 جاستاعى تۋريست جالعىز ءوزى شىمبۇلاق - تالعار اسۋى (3163 مەتر) - بوگدانوۆيچ مۇزدىعى (3500 مەتر) - اباي شىڭى (4010 مەتر) باعىتى بويىنشا كوتەرىلمەك بولعان. تانىستارىن ەسكەرتىپ، سول كۇنى كەشكى 21:00-دە قايتىپ كەلەتىنىن ايتقان، الايدا سودان كەيىن بايلانىسقا شىقپاعان.

"ەر ادامدى ىزدەۋگە دەرەۋ تجد قىزمەتكەرلەرى، تجم رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى مەن كينولوگيالىق ەسەپتوپتارى، قۇتقارۋ قىزمەتتەرى مەن "دوبروسپاس" ۆولونتەرلەرى جىبەرىلدى. قۇتقارۋشىلار ءتۇنى بويى تاۋدا ءتۋريستى ىزدەدى.

6 تامىزدا تاڭەرتەڭ تجد قىزمەتكەرلەرى ىزدەستىرۋگە ۇشقىشسىز ۇشۋ اپپاراتتارىن قوستى. تجم قازاۆياقۇتقارۋ اۆيابورتى دا ۇشۋعا دايىن بولدى. الايدا، تاۋلى ايماقتاعى اۋا-رايىنىڭ ناشارلاۋىنا جانە قاتتى جاڭبىرعا بايلانىستى ۇشۋعا رۇقسات بەرىلمەدى"، - دەيدى تجم وكىلدەرى.

ىزدەۋ-قۇتقارۋ وپەراسياسىنا الپينيزم فەدەراسياسىنىڭ قىزمەتكەرلەرى دە قوسىلدى. ءبىر تاۋلىك ىشىندە تجم جانە ەرىكتى قۇتقارۋ قىزمەتتەرىنىڭ قىزمەتكەرلەرى جوعالعان ءتۋريستىڭ تاۋ باعىتى بويىنشا بارلىق ىزدەۋ ايماقتارىن: چەرتوۆو شاتقالى، قارلىتاۋ شىڭى، حريششاتىي شىڭى، تالعار اسۋى، اباي شىڭى، بوگدانوۆيچ مۇزدىعىن بارىنشا قامتىدى. ىزدەۋ جۇمىستارى تۇندە دە توقتاعان جوق.

"بۇگىن دە ىزدەستىرۋ-قۇتقارۋ جۇمىستارى جالعاسادى، تجد قىزمەتكەرلەرى تاۋداعى اۋا-رايى جاقسارعاننان كەيىن ۇشقىشسىز ۇشۋ اپپاراتىن ىسكە قوستى. ىزدەۋ ورنىندا تجد، تجم رەسپۋبليكالىق جەدەل-قۇتقارۋ جاساعىنىڭ وتىزدان استام قىزمەتكەرى، ەرىكتى قۇتقارۋ قىزمەتىنىڭ ەرىكتىلەرى، قالالىق قۇتقارۋ قىزمەتىنىڭ قۇتقارۋشىلارى، الماتى قالاسىنىڭ الپينيزم فەدەراسياسىنىڭ وكىلدەرى، ەكى كينولوگيالىق ەسەپتوپ جانە ۇشقىشسىز ۇشۋ اپپاراتى جۇمىلدىرىلدى"، - دەلىنگەن تجم باسپا ءسوز قىزمەتى تاراتقان حابارلامادا.

جوعالعان ادامنىڭ تاۋ باعىتى تەك دايىندالعان تۋريستەرگە ارنالعان. اتالمىش باعىت الپينيزم داعدىلارىن جانە ارنايى جابدىقتارمەن جۇمىس ىستەۋ قابىلەتىن قاجەت ەتەدى.

تجم قۇتقارۋشىلارى تاۋعا جالعىز كوتەرىلۋ جانە مارشرۋتتى وزگەرتۋ ءقاۋىپتى ەكەنىن ەسكە سالادى.